Brazil-a President Jair Bolsonaro tana rinawm lorry driver eng emaw zat chuan inthlana leftist Lula a hneh loh avanga lungawi lovin kawngpui an dang.
Kawngpui dan hi ram chhung hmun hrang hrangah a ni a; mahse, state pahnih bikah nasa zualin ei leh in lam phurh kual pawh a buai phah.
Pathiannia inthlanah khan Lula hian vote tla 50.9% hmuin Bolsonaro-a hian 49.1% a hmu ve thung a ni.
Far-right president hian a tlawmna hi a pawm thu emaw, a khing let dawn emaw engmah sawi a la nei lo.
President kal chhuak tur hian Lula (Luíz Inácio Lula da Silva) hnena thuneihna hlan tur hian thla hnih vel hun a la nei a, president hlui hi January 1, 2023 hian lak luh tur a ni.
Bolsonaro-a tantu lorry khalhtute hian inthlan result puan a nih hnu lawkah ram pumah kawngpui hi an dang nghal.
Thawhtanni zan khan federal highway police chuan kawngpui dan hi hmun 342-ah a awm thu an sawi a, a lianthama chetna chu chhim lamah a ni hlawm tih an sawi a. Hmun thenkhata dan erawh police-in an titlang lehnghal thung.
Lorry khalhtu tam tak hian Bolsonaro-a sorkar hnuaiah khan diesel man tlawm zawka an lei theih avangin a lam hi an tang hlawm a ni.
Supreme Court judge Alexandre de Moraes chuan Thawhtanni khan police-te chu kawngpui dan zawng zawng titlanga a dangtute hnawt darh vek turin thu a pe.
Thawhlehni thlenga kawngpui la dang an awm a nih chuan darkar khat zelah a dangtute Brazilian real 100,000 (£16,700: $19,300) an chawi tur thu a sawi.
Kum 67 mi, Bolsonaro-a hian Pathianni zana a chak lo tih a hriat hnu lawkah khan a mu dawn tih a sawi.
A hmain thu mak tak tak sawi a ching a, ‘Pathian chauhvin’ a pisa atanga a paih thlak theih thu pawh a lo sawi tawh a. Inthlan hma khan vote thlak dan kalhmang chu a rinhlelhawm tih a lo sawi tawh bawk.