Phal loh thil hman loh mai hi kan damna tur a lo ni
Mizoramah ngei pawh plastic vangin kan nun a buai chho a, hman khat daih chauh hman khapna dan fel tak nei tawh mah ila vawiin thlengin zawm a la hlawh lo hle.
Fur ruahtui kan dawng chho mek a, kawr leh lui te deuhte mai bakah khawpui tui luan luhnaah te chuan bawlhhlawh an kalpui nasa hle. Plastic vawi khat chauh hmana ral mai thei mai tawh si lo, bawlhhlawh a chang ta an tam hle. Hmuh theih chin ringawt pawh hi buaipui tham a ni.
Mizoram sorkarin nikum November thla khan Plastic Waste Management Amendment Rules, 2021 hmangin hman khat chauh daih plastic (single use plastic) hman khapna thupek a chhuah a, dan bawhchhiate chu Rs nuai 1 leh lung in tan thlengin hrem theih ni mah se Mizoram tibuai mektu, plastic khapna thupek hian zawm a la hlawh tawk lo hle a, vawiin thlengin kan buaina a la ni zawk hial awm e.
Aizawl leh hmun dangah pawh dawrkaiten plastic leh a kaihhnawih an la zuar nasa hle tih thuneitute chuan sawiin, “Dawrah lei tur awm lo se chuan kan hmang tlem deuh tura ngaih a ni a, sumdawngte hian khap a ni tih an hre lo pawh a ni thei a, hre reng chungin an zuar lui pawh a ni thei a, tun dinhmunah chuan he khapna hian zawm a hlawh lo,” an ti a, ngaihtuah zui nasat a ngai hle.
Kan chenna khawvel leh kan chhehvel hi keimahni bawkin kan duat loh chuan a tuartu turte chu keimahni leh kan tuchhuante tho tho an ni a, tun atangin phal loh chu hman loh mai i ching thar teh ang u.