Madhya Pradesh, Khandwa district-a hmeichhe naupang bo chu mipain a pawngsualna hnuhma nen fu chinna hmunah hmuh a ni tih Thawhlehni khan police-in an sawi.
Naupang hi Thawtanni khan fu kung karah nikhawhrelova chhar a ni a, Indore-a damdawi inah enkawl mek a ni tih thuneitu sangin a sawi.
Hmeichhe naupang hi Jaswadi khuaa an in atangin a bo tih a chhungten an hrilh hnuah an zawng zui ta tih Superintendent of Police (SP) Vivek Singh chuan a sawi.
Police hian an chhui hnuah kawngkam thingpui dawra thawk tlangval kum 25 mi an man zui a. He pa hi Pathianni zan khan naupangte inah hian khum (cot) hawh turin a kal tih SP chuan a sawi.
Thu an zawh fiahnaah naupang hi fu huanah hian hruaiin a pawngsual ngei thu a inpuang tawh a. A sawina hmun hi dap nghalin naupang hi nikhawhrelovin an hmu zui ta a ni.
District hospital-ah lak nghal a ni a, Indore-a damdawi in lian zawka enkawl tura kalpui leh a ni tih a sawi.
An manin a sawi dan chuan naupang hi a muthilh hlanin a la chhuak a, fu huanah hian kalpuiin a pawngsual a, a buk karah a kalsan ta mai a ni.
Police chuan Indian Penal Code (IPC) section 363 (kidnapping) leh section 376 (rape) bakah Protection of Children from Sexual Offences (POCSO) Act hmangin thubuai an siamsak nghal.