Pathiannia Gujarat-a Morbi khaw bula kea kal ngai lei, chawlh hmanga mi tam takin an zawh laia chim taa mi 141 vel an thihna a thlen khan chhanchhuah hna thawktuten a rang thei ang berin an pan nghal a; mahse, heng mite thlan hma hian a bul hnaia lo awm tam tak chu luiah zuang lutin nunna tam tak an lo chhan hman.
Jignesh Laljibhai leh a hnuaia sipaia tan tuma thil zirte chuan lei a chim hma lawka an kal pelh laiin mi an tam hle tih an hmu hman a. Lei a chim veleh khan rang takin a hote nen an che chhuak zui nghal bawk.
“Ka naute kha lei lam pan turin ka hrilh nghal a. Tui hleih thiam chu luiah an zuang lut a, a thiam loten hruizen an lo vawm lut bawk,” a ti.
“Mi 80 atanga 90 vel nunna kan chhan hman niin ka hria a, thenkhat kha chu naupang an ni,” a ti.
Britain-in India a awp hun laia dawh tawh lei hi a chim lai hian a chungah mi 400 chuang an awm niin thuneitute chuan an sawi.
Lei chim ta hi thla eng emaw zat chei that hna thawh a ni a, a chim hma ni li leka hawn a ni.
Tual chhung thuneitute pakhat chuan sana leh electric lam siamtu company pakhat, he lei enkawltu, Oreva chuan kar hmasaa hawn leh tan a nih dawn khan thuneitute an hriattir miah lo niin a sawi a, vantlang hman turin a him tawh tih lantirna lehkha (certificate) engmah pek chhuah a awm lo niin NDTV hnenah a sawi.
“Sorkarin tender a chhuah a, Oreva hian an chei that dan kimchang hi thehlutin hawn a nih hmain a that dan endik tur a ni a; mahse, engmah tih a ni lo va, sorkar pawhin chu lam chu a ngaihtuah lo,” tiin Morbi municipal agency chief Sandipsinh Zala chuan a sawi.
Lei chim ta hi metre 1.25 (4 feet)-a zau niin metre 233 (255 yard)-a sei niin Darbargadh Palace heritage hotel leh khaw inkalpawhna a ni.