South Korean singer leh actor ni bawk Lee Ji Han chu Seol khawpuia Halloween neih laia inpawnchilhna thlengah khan kum 24 mi niin a thi.
Hriathlawh chho tak Lee thihna hi amah enkawltu 935 Entertainment agency chuan nimin khan thuchhuah siamin an tarlang.
Itaewon venga chhiatna rapthlak tak thlengah khan vanduai zingah telin, October 29 zana Itaewon chhiatna ah khan Lee Ji Han hi thi zingah a tel tih kan puang a ni, an ti.
Thuchhuah an siamah hian kha thil thleng kha mumang mai ni se, an tih thu te, an thu dawnin nasa taka a barakhaih thu te an tarlanga tel a, a chhungte’n hun hrehawm vawrtawp an hmang mek a, thlamuang taka a chawlh hahdam ngei an beisei thu te thlengin an ziak tel bawk.
South Korea lemchan leh rimawi lama hriatlar chhoh ni mek Lee thihna a thawhpuite bakah fan te a tihrilhhai hle a, an vuina thu an sawi hlawm.
Seoul khawpuia Halloween lawmnaa vanduaina thlengah khan mi 154 an thi a, thi zinga tam zawk hi tleirawl niin, mi za chuang an hliam bawk.