France midfielder Paul Pogba chu a khup hliam avanga zai a tawh hnuah a dam hman loh avangin kumtawp a Qatar a khelh tur World Cup-ah a tel ve dawn lo tih a agent in a sawi.
September thla khan Pogba hi a hliam avangin zai a ni a. Tunhnaiah a hliam hi vawi hnih ngun taka enfiah leh a nih hnuah Juventus squad-ah emaw France squad zawm turin a la dam tha tawk lo tih an pawm tlang.
Pogba agent Rafaela Pimenta chuan Thawhtanni khan, “Nimin leh vawiinah Turin leh Pittsburgh-ah te Pogba hi endik a nih hnuah pawi ti tak chungin la inenkawl a mamawh thu hi kan sawi a ngai.”
“Hei vang hian Paul hian World Cup hma in Juventus squad a zawm thei dawn lova, Qatar-ah France squad-ah pawh a tel thei dawn lo. Kan duhthusam anga thil kal tur nise naktukah Paul hi a inkhel nghal ang. Mahse hei hi kan dinhmun a ni rih.” tiin a sawi.
Kum 29 mi Pogba hian July thla a free transfer a Manchester United atang Juventus a zawm hnuah a club tan hian pre-season tih loh a la inkhel miah lo.
July thla khan pre-season inbuatsaihnaah Pogba hian a khup hi a ti na a, a tirah zai lova inenkawl han tum zet mahse a hnuah zai chu a tan a tha zawk dawn niin thutlukna an siam.
Kum 2018 World Cup an chawi tuma France player tangkai Pogba dinhmun hi coach Didier Deschamps hnenah pawh kimchang taka hriattir zel a ni a. France midifelder dang N’Golo Kante a inhliam ve bawk avangin in November 22 a Australia an khelh hunah Aurelien Tchouameni leh Adrien Rabiot te chu muallai luah tura ngaih an ni.