Aizawl : Lunglei district huam chhung Aizawl – Thenzawl – Lunglei (ATL) World Bank kawng 100Km-160Km (Kanghmun–Lunglei) dinhmun chungchangah nimin khan Lunglei Bawrhsap Kulothungan hovin a kaihhnawih mipawimawhte an thukhawm a. Lunglei Bawrhsap chuan Bhavya Construction te hnathawh leh an hmalaknate a that tawk loh thu sawiin, kawng thawmthat hna chu zo fel thuai tura chak taka hma la turin a hriattir.
Lunglei Bawrhsap chuan hnathawh kal mek chu uluk taka enfiah tur leh a tul anga na taka nawr turin PWD hotute pawh a ngen a. Kawng chhe tak avangin chhimlam mipui ten harsatna nasa tak an tawh thu sawiin, district thuneitute chuan mipui himna an dah pawimawh hmasak ber thu leh kawng chhiat avanga tawhsual tawk an awm palh te a hlauhawm thu sawiin, zo fel thuai tura hma la turin a mawhphurtute chu a chah a ni.
Lunglei kawng chungchangah hi kumin September ni 26 khan Lunglei Bawrhsap ho bawka sawiho a ni tawh a, hemi tum hian Bhavya construction chuan kumin October ral hma ngeia kawng thawmthat hna zawh an lo intiam tawh. Kawng thawmthat hna hi la zawh loh niin, kawng dinhmun pawh a la chhiat em avanga tuntuma thutkhawm chu koh leh a nih thu sorkar thuchhuahin a tarlang.
October ni 28 khan sub-hqrs YMA conference hall-ah PWD CE (P) Er Lalrinkima Hna- mte hovin kawng chungchang hi sawiho a ni tawh a. PWD chuan Bhavya construction chu kumin December ni 20 hma ngeia kawng thawmthat hna zo turin an hriattir a. Labour 14 thawk mek bakah thawktu 20-30 lak belh tura hriattirin, November ni 5 ral hmaa hmalakna thar a awm loh chuan Bhavya construction te security deposit hmanga hna thawh a nih tur thu SE Lunglei Circle, PWD Er Lalthanzuala chuan a sawi a ni.
Sub Hqrs YMA, Lunglei hotute chuan tunkar Thawhtanni khan Sekhum dai thleng hnathawh an enfiah a. Sub-hqrs YMA President Lalrotluanga chuan kawng chhe siam hnathawh mek chu duh thu a sam loh thu leh a tul anga hmalak zel dan tur an ngaihtuah tur thu a sawi bawk.