Aizawl: Mizoram Pradesh Youth Congress Committee (MPYCC) President Dr Lalmalsawma Nghaka chuan Mizoramin tun dinhmuna a mamawh ber chu thusawi thiam ni loin hnathawk thiam a nih thu a sawi.
Congress Campaign Committee-in Aizawl khawpui chhunga an party unit tlawh chhuah programme an hman mekah Thawhtanni zan khan Chhinga veng unit pathum te an tlawh a. He hunah Dr Lalmalsawma Nghaka hian, kum 2023 inthlanah sorkar tha siam turin Congress party a inbuatsaih mek tih sawiin, “Mi ram chief minister awt ngawih ngawiha kan awm tawh lohna turin sum enkawl thiam leh eirukna laka mi fihlim, Pu Lalsawta chu Mizoram mipuiten kan chief minister-tir ngei a ngai a ni,” a ti.
Congress Thalai president hian tun dinhmunah Mizoramin a mamawh ber chu thusawi thiam ni loin, hnathawk thiam a ni tiin, enchhin ve ngai tawh lo hruaitu tha hmang hian ram sum dinhmun harsatna khurpui ata chhanchhuah hna hi thawh a tul tawh niin a sawi.
Dr Lalmalsawma Nghaka hian Congress party manifesto pakhatna, ‘Tang Puihna’ chu ram siam tak tak tumna, taimakna leh tumruhna kawng zawh tlan theih nana duan a nih thu leh, sorkar leh mipuite tang tlangin ram nuam leh thangduang a nih theihna tura inlawm tawnna tur thuthlung a nih thu a sawi a. Hetih lai hian, MNF party manifesto erawh rintlak a nih lohzia Mizoram mipuiten an hre chiang tulh tulh a, mahni intiamna pawh hlen zo lo party an nih thu a sawi bawk.
Congress party-in Aizawl khawpui chhunga an party unit inthlawhchhuah programme an neih hi Chhinga Venga B. Lalngaihawma Inah neih a ni a. Nizan khan Maubawk Unit-te an tlawh leh a ni.