Aizawl: Mizoram BJP Spokesperson Lalremsangi Fanai chuan MNF sorkar hnuaiah Mizoram Healthcare Scheme a tluchhia niin a sawi.
Nimina Aizawl Press Club-a thuthar thehdarhtute kawmin Lalremsangi Fanai hian khawvel sorkar zawng zawngin an ngaih pawimawh ber chu mipuite taksa hriselna, healthcare a nih laiin mipui hriselna ngai pawimawh duh lo MNF sorkar hnuaiah erawh Mizoram Healthcare Scheme a tluchhia niin a sawi a. Khawvela healthcare scheme lian ber, AB-PMJAY (Ayushman Bharat-Pradhan Mantri-Jan Arogya Yojana/Prime Minister National Health Protection Mission/PM Healthcare Scheme kalpui a nih hlauh avangin sorkar laipui chungah lawmthu sawi mawlh mawlh chu mipui tih tur a nih thu a sawi.
Lalremsangi Fanai hian MNF sorkarin Mizoram State Healthcare a kalpui anga state sorkarin damlote leh hospital hnena inenkawlna senso a ba tam tih sawiin, Mizoram State Healthcare-a chhungkua inziak lut 39,505-te thawhkhawm chu Rs 7,12,37,000 lai a nih thu a sawi a. “Mipui leiba tipung tura loan hmanga health Care enkawl tum pawh hi mipui zah lohna a ni. Contract leh thil dangah pawisa harsat sawi si lo. Mizoram State Health Care kalpui ve chungchangah chief minister emaw, health minister-in emaw, phat mawina zawn reng hi a zahthlak,” a ti.
Mizoram BJP aiawha thupuangtu hian Prime Minister Healthcare Scheme hnuaiah Mizoram chhungkua 2,26,147 atangin AB-PMJAY Scheme-ah chhungkua 1,94,859 an inziak lut thei a, chhungkaw tam zawk ziah luh loh leh inziah luh nachang hre lo an la tam niin a sawi a. Central scheme & programme-te a chhawrtu tur mipuite hnen thleng turin beihpui thlak leh, PM Healthcare Scheme-a Rs. nuaih 5 thleng chhungkaw tin tana a taka pawisa dah sa vek a awm tih pawh Mizoram BJP chuan an puang nghal thu a sawi bawk.