Aizawl: Chief Minister Zoramthanga’n Mizorama thei leh thlai thar chhuahte mumal taka hralh chhuah a nih theih nan sorkarin marketing society board mumal tak a din a ngai tih nimina Tualte Tomato Festival kharna inkhawmah a sawi.
Horticulture department leh Tualte Tomato Growers Co-operative Society Ltd-in October 25 atanga an buatsaih, Tualte Tomato Festival kharna chu nimin khan RB MC Cbae Hall, Aijal Club-a neih a ni a. Khuallian chief minister chuan horticulture leh agriculture product-te chu thar chhuah tam a pawimawh ang bawkin a sawngbawlna leh a hralhna lam pawh mumal taka ngaihtuah a pawimawh thu a sawi a. Thlai leh thei thar chhuahte hralhna kawng kawhhmuh chu sorkarin a tih a tul thu leh marketing society board mumal tak din a tul thu sawiin, hei hi a rilruah a awm lian hle niin a sawi.
Chief minister chuan Mizoramin leilung hausakna a neih tam thu leh ram chhunga cheng mipui let thum chawm zo tur thar chhuah theihna a awm thu sawiin, “Mizoram thlai chinte chu a hralh kawngah harsatna a awm loh phawt chuan thar tam tura infuih a ngai tawh dawn lo va, IV grade leh LDC inchuh buai tawh lovin mipuiin lo neitu nih an hreh tawh dawn lo,” a ti.
Tualte leh khaw dangten society mumal tak dina an thlai thar an hralhna atanga nuai tel an la lut zel chu lawmawm a tih thu sawiin, chief minister chuan hei hian ram economy thanna turah pawh rah tha a chhuah zel a beisei thu a sawi.
Deputy Cheif Minister Tawnluia pawhin tomato festival chu Tualte mai ni lo, Mizoram hmun hrang hranga awmten tomato chin an uar leh zual theihna tura buatsaih a nih thu a sawi a. “Mizorama thar tomato-te chu a tui bik a, thil thar chhuah leh intodelh kawngah hma kan sawn zela phai lam atanga kan mamawh lak luh a tlem tial tial ka beisei,” a ti.
Horticulture Secretary K Lalthawmmawia kaihhruaia hun hmanah hian special guest, Prof. F. Lalnunmawia MLA, Tualte Tomato Growers Co-operative Society Ltd hruaitute leh Horticulture Director Dr Elizabeth Saipari ten thu an sawi bawk.
Inkhawma an tar lan danin Tualte khuaah hian chhungkaw 223-in tomoto kung 1,000 chuang theuh an ching a, kum 2019 atanga tun thlengin Rs nuai 600 chuang an la lut tawh a, an tomato tharte hi state pawn hmun hrang hrangah thawn chhuah thin a ni.