Kumin NBA champion ni thei tura rinhlawh zing ami Milwaukee Bucks chu league a tlawm nei lo awm chhun ni turin an kal zel a. Detroit Pistons lakah 110-108 in an chak.
Thawhlehni zingah Bucks in Fiserv Forum-ah team naupang tak Detroit Pistons an mikhual a. Pistons hian a zawnin league a team tha nilai hneh tumin an bei a, an inkhel tawk viau.
Bucks tan Jrue Holiday chu hun pawimawh a danglamna siamtu a ni a. Second 45.3 a la awmin 3 points tangkai a lut a, Pistons hmahruaina a nawtreh. A tawpah Bucks in bucket pawimawh nei thin zawkin hnehna an chan theih phah.
Holiday hian point 25 a score bakah assist 10 leh rebound vawi sarih a nei.
Bucks tan star player Giannis Antetokounmpo chuan point 31 score in Brook Lopez chuan point 24 a score a. Bobby Portis-a’n point 15 leh rebound 12 a la ve bawk.
Detroit hian Thawhtanni khan champion lai Golden State Warriors lakah hnehna changin a zawna vawi nga an tlawm tawhna an titawp a. Pistons hian team lian a zawnin an hneh teuh.
Pistons starting line up-ah player pakhat chauh kum 23 aia upa a awm a, heng zinga pathum hi kum 21 aiin an naupang.
Player hmabak eng tak tak nei a ngaih Detroit hian fak an hlawh a. Brook Lopez chuan inkhel zawhah, “Player talent nei tha tak takin he league a inkhelh an zir mek a ni a, hma an sawn chak hle. An record neih anga en chi an ni lova, hei ai hian an tha daih zawk.” tiin an khingpuite a fak.