PC party President Vanlalruata’n nimin khan Bairabi hydel project hmun tlawhin, Lal Thanhawla kaihhruai Congress sorkar leh Zoramthanga kaihhruai MNF sorkarin Bairabi dam project chu an bawhzui duh lo nia sawiin, a rilru a nat thu a sawi a. Ram ngaihsak lovah party dang te chu a puh.
Vanlalruata chuan ZPM party pawhin Bairabi dam project chu bawhzui an tum loh thu an tichiang tawh nia sawiin, “party dang ten kan ram leh mipui dinchhuah theihna an ngaihsak duh miah lo hian ka rilru a tina a ni,” a ti a. Bairabi dam project chu ram hmasawnna ruhrel pawimawh ni tur a nih thu sawiin, tihpuitlin a nih theihna tura thawhpuiah mip- uite a sawm.
PC party President-in Bairabi a tlawhnaah hian PC party Sr. Vice President Lal- rinzuala Chawngthu, General Secretary Lalramthara leh VL Thazova, Secretary B Lalrammuana leh Alfred Zoremsanga ten an tawiawm a. PC party hruaitute chuan Mizorama hydel project hmachhawp zingah a taka kutthlak leh bul ṭan tawh awmchhun chu Bairabi dam project hi nia sawiin, PC sorkar laia bulṭanin tuikhuah innghahchhan (foundation) turin luikam sir tawn tawnah lian leh thuk takin hmun 6-ah lei verh a nih thu leh leiverh te hi Lal Tha- nhawla’n ‘sakuh kaw tiat’ tia a sawi laiin a takah chuan feet 8 hawlhtlang vela lian vek an nih bakah luichhuat pawh thuk tak verha enfiah vek a nih hnuah khuah ngam ngei a ni tih finfiah a nih thu an sawi.
PC sorkar hmalakna chu kum 30 deuhthaw chhunga bawhzui a nih loh avangin Mizoram hmasawnna ruhrel pawimawh tur chu tunah chuan hmun hlui satliah a ni ta niin PC hruaitute chuan an sawi a. “Bawhzui duhlotute hian mipui dem rawn hial an hlawh a. ZPM party-in bawhzui an tum lo zui hi a pawi” tiin, “hei hian party dangin kan ram an ngaihsak loh zia a tichiang a ni,” an ti.
He project hi ngaihsak zui a nih loh avangin ramhnuai pik tak a ni tawh tih PC party hruaitute chuan sawiin, leiverh te pawh hmuh theih a ni tawh lo niin an sawi a. Kum 2014, November ni 27-ah tuna PC President Vanlalruata ho tho hian MNF, MPC, PRISM leh ZNP hruaitu mi 26-in Sairang atanga Tlawng luia lawnga kalin an tlawh tawh tih sawiin, hemi ṭum hian a hmunhma chu vâtin leiverh te pawh an sâm chhuak vek niin PC hruaitute chuan an sawi bawk.