Reliance Foundation leh Mizoram Football Association chuan naupang football zirna tur ‘Naupang League’ chu Mizoramah a kalpui dawn.
Reliance Foundation Chairperson Nita M. Ambani chuan Mizoram Football Association leh Reliance Foundation thawhhona hnuaiah naupangte’n football zirna tha zawk an neih ngei a beisei thu a sawi.
Naupang League
Reliance Industries Ltd hnuaiah Reliance Foundation a awm a, chumi hnuaiah chuan peng hrang hrang a awm leh a, chumi zinga pakhat chu Reliance Foundation Young Champs a ni.
Hei hi naupangte football zirna project lian tak a ni a, anni leh MFA thawk dunin Reliance Foundation Young Champs Naupang League kalpui a ni dawn ta a ni.
Hun rei deuh tak atangin inrawn khawmna kalpui a ni a, November thla chawnhu lamah Aizawl leh Champhai-ah bul tan a ni ang a, hei hi RFYC lam kalpui tur a ni ang.
Hetihlai hian RFYC hian MFA leh District Football Association-te nen tang dunin Kolasib leh Lunglei lamah naupang inelna hi an kalpui bawk dawn a, a kalphung erawh a dang hret ang.
Nita Ambani thu leh hla
Reliance Foundation hotu lu ber Nita M. Ambani chuan, “Mizoramah chuan footbaall hi an nunphungah a bet a, an khawtlang nunah a tel ve tlat a ni. RFYC leh MFA thawhhona zarah mipa leh hmeichhe naupang talent nei tha tak takten football zirna tha leh changtlung zawk an nei dawn a ni,” a ti.
“Naupang tê zawkte’n kum nge vel an nih atangin inkhelhna hun tha an hmu dawn a, football-a inhmang nasa tak state Mizoram naupangte tana kawng inhawng tur hian min tiphur takzet a ni,” tiin a sawi bawk.
Nita Ambani chuan India ram pumah grassroots football hmasawnna tura tha thawh zel tura an inhawn thu a sawi
MFA thu leh hla
MFA Honorary Secretary Lalnghinglova Hmar chuan, “Reliance Foundation kan thawhpui tur hi kan phûr tawh takzet a, hei hian Mizoram mai ni lo India rama football kalphung hi a thlak danglam theih kan beisei a ni. Naupang League kalpui turah hian khawtlang mipui an tel ve zel dawn a, naupang mai ni loin nu leh pa leh khawtlang an tel tur hi a phurawm khawp mai,” a ti.
India rama project hmasa bera neih tur hi a hlawhtlin ngei a beiseiawm thu sawiin MFA Hony Secretary chuan, “India ramin FIFA Under 17 Women’s World Cup a thlen kum leh FIFA Men’s World Cup 2022 khelh kumah tak bul kan tan tur hi a phurawm lehzual a, Reliance Foundation-in naupang tana hun tha an siamsak hi kan lawmna tizualtu a ni,” a ti.
RFYC lam rawt angin Aizawl leh Champhai-ah Naupang League hi changtlung zawka kalpui a ni phawt ang a, Kolasib leh Lunglei lamah DFA nen thawkhoin kalpui a ni bawk ang.
Inelna kalphung tur
Aizawl leh Champhaiah hian Under 5, Under 7, Under 9, Under 11 leh Under 13 pual league siam a ni ang a, team pakhat neituin heng kum bithliah team hi an neih kim a ngai ang. Sikul chawlh apiangin an inkhel thin ang a, round 30 aia tlem lo khelh tur niin kum 2023 May thla vela zawh theih beisei a ni.
Inelna senso hi RFYC-in a tum dawn a, an jersey-te an tum dawn bakah mamawh tul dang (medical duty, ambulance, referee etc) pawh an pe vek ang a, a enkawltu tur bik an ruai dawn bawk.
Kolasib leh Lungleiah pawh inelna hi tlema tihdanglam deuh leh zangkhai deuha kalpui tur a ni a; chutihlaiin RFYC atanga coach lo kalte’n a khat tawkin league khelhna hi an tlawh kual reng dawn a, player tha bik tan residential camp siam thin a ni ang. Season tawpah player tha thlan chhuahte RFYC hmunpui Mumbai lamah inzir zel tura kalpui an ni ang.
League match khelh loh niin zing/tlai lamah naupangte tan training pek a ni thin ang a, inkhel zawng zawng hi awmze neiin record tur a ni. He project kalpui pah hian coach education leh referee development project kalpui a ni ang.
Football kalphung thar
RFYC lam hian India rama football zirna hmun tha bera chhal ngam Mumbai-ah an kalpui mek a, naupang tha lak khawma training pek tlut tlut a pawimawh rualin a taka inkhelhtir a, chuta tanga naupang thiam thlan chhuah leh chu tha zawkin an ring.
Hemi tur hian India ramah naupang pual football league kalpui a, chuta a tha thlan chhuah chu an tum – hun rei lo te trial neih chhunga thlan chhuah ni loin kum tluana inkhela a tha tih hriat sa lak khawma zirtir zel a, India football thlak danglam theih an inbeisei a ni.