Aizawl : Social Welfare & Tribal Affairs department-in Ministry of Tribal Affairs sum Rs. nuai 100 senga an sak, Ngopa-a Youth Development Centre (YDC) chu nimin khan Sialkal Range Development Council (SRDC) kutah an hlan.
Youth Development Centre inhlanna lehkhaah Social Welfare & Tribal Affairs deptt. aiawhin Secretary Arun Mishra leh SRDC aiawhin SRDC Development Officer Remlalliana Hnamte ten hming an ziak.
YDC building inhlanna inkhawmah Social Welfare Dr. K. Beichhua chuan thalai ten eizawnna puitling an neih theihna tura tangkai taka YDC building chu hman a nih ngei a duh thu sawiin, SRDC area leh Ngopa chhehvel thalaite tana malsawmna a nih ngei a duhsak thu a sawi.
SRDC Chairman L. Thangmawia, MLA pawhin MLA a nihnaa a rawtnate Social Welfare Minister-in ngaihpawimawh sakin, kum 2019 kumtir khan YDC building sakna tur chu central-ah thlenin hma a laksak tih a sawi a. A sak zawhna rei deuh tawh mahse, hri leng avangin kumin September ni 10 khan Social Welfare Minister-in a hawnsak thei chauh tih a sawi.
YDC enkawl phalsak an ni chu SRDC tan mellung pawimawh tak a nih thu SRDC Chairman chuan sawiin, YDC chu SRDC area mai bakah Ngopa chhehvel thalaite tan tangkai taka hman tum a nih thu a sawi a. Thalaite mamawh training hrang hrang buatsaih theihna tura rawtna a duh apiang tan thlen theih reng a nih thu a sawi bawk.