Taitesena Group YMA leh Langkaih Group YMA-in Mizorama kuhva tharte hralh kawnga harsatna awm mek zirchianga hma la tura an din, Jt. Group YMA Study Team-in nimin khan Mamit tlawhtu, Union Agriculture & Farmers Welfare Minister Kailash Choudhary hmuin, tha taka kuhva an hralh theihna tura hma laksak tura ngenna an thlen.
Union Minister Choudhary chuan Mizoram kuhva tharte tha taka a kal theihna turin an harsatna tawhte chu Union Home Minister Amit Shah sawipui a tum thu sawiin, Assam sorkar leh Mizoram sorkar pawh sawipui a tum thu YMA study team hruaitute chu a hrilh.
Jt. Group YMA Study Team hruaitute chuan an kuhvate man zawk leh mumal zawka an hralh theih dan turte pawh union minister chu an sawipui a. Hachhek bialah kuhva sawngbawlna an neih loh thu leh an mamawh thu pawh lo thlenin minister chuan Farmers Producer Organisation (FPO) din tura rawnin, central atanga kuhva sawngbawlna tur ngaihtuahpui an nih tur thu study team hruaitute chu a hrilh bawk.
Hachhek bialah hian Hachhek Kuhva Chingtu Pawl (HBKCP), Hachhek biala VC-te leh tlawmngai pawl hrang hrangten kuhva hralh kawnga harsatna an tawhte sutkian a nih theihna tura hma la tura sorkar kar nan nimin atang Hachhek bial chhunga sorkar pisa kai tur an dang a, Zirtawpni thleng dan an tum.
HBKCP hruaituten The Zozam Times an hrilh danin, sorkar pisa kai tur dang tur hian Hachhek biala khaw hrang hrangah thahnem tak duty mah se, sorkar hnathawk pisa kai tum dan tur an awm lo thung a. Sorkar atanga thu lawmawm an dawng lo a nih chuan pisa kai tur dan chu Zirtawpni thlenga chhunzawm an tum a ni.
HBKCP leh Hachhek bial chhunga pawl hrang hrangten an ruahman dan chuan sorkar pisa kai tur an danin awmzia a nei lo a nih chuan Zirtawpni atanga karleh Thawhlehni thlengin state dang nena inkalpawhna kawng dan chhunzawm an tum a, hei pawh hian awmzia a la nei lo a nih chuan karleh Nilaini atangin tiamchin awm lo total bandh neih an tum.
Sorkar kar nana HBKCP leh pawl hrang hrangin sorkar pisa kai tur an dan hi political party leh pawl hrang hrangin an thlawp thu thuchhuah siamin an puang hlawm a. ZPM Hachhek Joint Block chuan Mizoram sorkar chu Hachhek bial kuhva chingtute harsatna a theih anga ranga chin felsak turin an phut.
Hachhek Constituency Development Committee (HCDC) pawhin hmalakna kal mek an thlawp tlat thu sawiin, a tul anga puih an inhuam thu an sawi bakah Burma kuhva ro vanga buaina a reh theih nan Mizoram leh Assam sorkar pawh awmze nei thama inbe ngei tura an ngen thu an sawi bawk.