Tottenham in UEFA Champions League group stage khel pha lo tura an hniam zuai zuai hnuah an dinhmun an thlak danglam a. Group D hmahruaitu ni chunga round of 16 lut turin Olympique Marseille 2-1 in an hneh.
Stade Vélodrome a inkhel hmuhnawm leh tlin inchuhna boruak ngaihnawm karah Spurs tan Pierre-Emile Hojbjerg chuan minute 95-naah goal a khung a. Tla tura an awm hman tawh hnuah Tottenham in tlin phah nan an hmang.
Spurs hian knockout stage lut turin a chhe berah draw result an mamawh a, mahse Marseille in halftime dawnah Chancel Mbemba hmangin goal an khung.
He goal avang hian pathumnaah tla thla in Europa League khel tur dinhmunah an ding. Mahse second half-ah defender Clement Lenglet chuan Spurs si phurh a sut a. Marseille in chakna goal zawng a na taka an nawr laiin Tottenham an inveng him hram thin a, a tawpah erawh chakna goal khungtu zawk niin London club an lawm.
Chakna goal an khung avangin Marseille tan beisei tur a awm lova, Europa League pawh khelpha lovin an group atangin an tla.
An tan result na tak a ni a, Arsenal striker hlui Alexis Sanchez leh Jordan Veretout ten goal an khung teuh.
Spurs tan striker Harry Kane chuan goal khat pawm loh a nei ve thung a. Mahse an huntha neih ang chhun goal-ah an khung theih avangin an chak.
Hrem avanga a pawlte inkhel enkawl thei lo Antonio Conte aiawhtu Tottenham assistant Cristian Stellini chuan, “Kan chak avangin kan lawm a, kan chak dan pawh kha a nuam duh hle. Antonio nen pawh kan inbia a, entu mipuite ang bawka inkhel en chu a tan a hreawm hle tih ka hria. Tih theih nei si lovin a lo tang ve hle thin.” tiin an inkhel zawhah a sawi.
Tottenham goalkeeper Hugo Lloris chuan, “Tlang taka sawi chuan hetiang inkhel hi kan beisei lawk a ni a. Stade Velodrome hi engtiklai mahin inkhelh awlsamna hmun a ni ngai lo. Hei vang hian chak turin huaisenna nasa tak kan lantir niin ka hria.” a ti ve bawk.
Atletico an tla fai thak
Spanish club Atletico Madrid tan Europe huap inelna khelh tur a awm tawh dawn rih lo. FC Porto laka 2-1 a an tlawm avangin an group-ah a mawng berah an awm.
Rojiblancos hi kar hmasa khan round of 16 a tling thei tawh lo an ni chiang tawh a, mahse Europa League round of 32 khel thei an la ni.
Estádio do Dragão-ah Porto in mikhualin Mehdi Taremi leh Stephen Eustaquio hmangin goal an khung a. Goal hnih a hun rei tak hma an hruai chhungin Atletico Madrid in an tih thaih thei meuh lo.
Huntawp dawnah Porto defender Ivan Marcano chuan an lamah tilutin Atletico in goal khat an nei ve chauh.
Atletico coach Diego Simeone in kum 2011 a club a enkawl hnua a vawikhatnan a Champions League group a a mawngphah a nihna a ni.
Tun season-ah inelna hrang hrangah game hnuhnung 12 atangin vawi li chauh chak an nei mek.