Hachhek Bial Kuhva Chingtu Pawl (HBKCP) leh Hachhek bial chhunga pawl hrang hrangte chuan an kuhva tharte hralh a nih theih nana hma la tura sorkar kar nan nimin khan an bial chhunga sorkar pisa kai turte an dang leh.
HBKCP hruaituten The Zozam Times an hrilh danin, Hachhek bial khaw hrang hranga sorkar pisaah an duty hlawm a, forest department-a thawk thenkhat pisa kai tur an dan bakah department danga thawkte erawh duty dan lui ngai an awm lo a, boruak ralmuang tak hnuaiah hun an hmang a. An lo ruahman sa angin Zirtawpni thleng sorkar pisa kai tur hi dan an tum.
Tar lan tawh thin angin HBKCP leh pawl hrang hrangte hian an kuhva hralh kawnga harsatna an tawhte sutkian a nih theih nana hma la tura sorkar kar nan ni li chhung sorkar pisa kai tur dan an rel a, an ruahman angin Thawhlehni atang khan sorkar pisa kai tur hi an dang tan ta a ni.
Sorkar pisa kai tur danga an hmalakna hian awmzia a neih loh chuan November 4 atanga 8 chhungin inter-state inkalpawhna kawngpui dan an tum a, hei pawh hian awmzia a la nei lo a nih chuan November 9 atangin tiamchin awm loa total bandh huaihawt an tum a ni.