- Ruata
Honda chuan an SUV chhuak mek WR-V thar, a chhuan hnihna, second-generation WR-V chu Indonesia-ah an phochhuak a. Indonesia-ah hian hralhchhuah a ni phawt ang a, India rama an hralh dawn leh dawn loh zirchian mek a la ni thung a ni.
India tana zirchian mek a ni nachunga kan thlirho nachhan chu Honda WR-V hi India ramah pawh a chhuak mek a. Tuna a chhuan hnihna model thar hlak erawh hi chu India market tan an la zirchiang te pawh a nih hmel a ni. Honda WR-V hi compact SUV huanga mi a ni a, India rama compact SUV dangte nen a inel mek a, tuna a chhuak thar, 2nd generation model hi rawn tichhuak leh se, leitute a hip lehzual ang em tih chu zawhna lian tak a ni a. Company atang pawhin thuchiang a awm thuai a beiseiawm a ni.
Design leh thildang
Honda WR-V hi Honda Concept RS SUV nen a landan a inang deuh reng a, he concept lirthei production version hi a ni, tihte pawhin a sawi theih ang chu. New generation Honda WR-V hian Honda SUV lian ho HR-V leh CR-V te design a pawl bawk a, kawng hrang hrangah an landan hian inanna an nei a ni. WR-V hi a coupe SUV design nei a ni a, wheel arches pawh a nei a, alloy wheel lian tha tak 16/17 inch, a variant azirin a hmang bawk a ni.
WR-V thar hian LED taillamp sin tha tak mai a nei a, a bumper chu a lian leh mawi tak a ni bawk a. Styling package pahnih WR-V E, tlema design mawlmang deuh leh 16-inch alloy wheel nei a awm a, hei bakah hian sports design nei WR-V RS version, 17-inch alloy, red accent, grille thar leh all-black interior nei te a awm bawk a ni. Hei bakah hian dual-tone exterior paint scheme duhthlan tur a awm dawn bawk a ni. WR-V sports analogue dial, 4.2-inch MID nei tel a neih dawn bakah remote hmanga ‘start engine’ leh ‘air conditioner’ thunun theihna a awm dawn bawk a ni.
A lenzawng leh kentel
Honda WR-V thar hian Honda City chhuak hmasa zawk leh Honda Amaze ten an hman mek ang platform a hmang a. WR-V hi dung, a san zawng leh a vang chu a indawt dan hian 4,060mm, 1,608mm leh 1,780mm te a ni a, a hmaa lo chhuak tawh ai chuan a lian hret dawn a ni. A ground clearance hi 220mm niin a chhung zau zawng, boot space 380 litres a ni bawk a ni.
Himna lamah chuan airbag 6, ADAS tech, Honda Sensing, tih te a nei dawn a, heng hnuaiah hian lane keeping assist, automatic emergency braking, lane departure warning, adaptive cruise control leh auto high beam assist te a awm a ni.
A chhung
A chhung hi a hmaa mi nen a design lamah chuan danglamn liantham lutuk a awm lo a. Tuna India rama chhuak mek Amaze sedan nen a inang viau mai a, a dashboard, infotainment screen steering wheel, control hrang hrang leh a seat te thlengin Honda Amaze nen a inang tlangpui dawn a ni.
A khawl
Tuna Honda City pawhin a hman mek ang, 1.5-litre petrol engine, 121hp power leh 145Nm torque pechhuak thei a hmang ang a. Gearbox lamah chuan five-speed manual leh CVT gearbox duhthlan tur a awm hmel a ni.
India-ah WR-V
Tunah hian Honda chuan Hyundai Creta Kia Seltos, Maruti Suzuki Grand Vitara leh Toyota Hyryder te nena inel tur SUV thar tihchhuah tumin ruahmanna an siam mek niin a lang a. Hemi hi an tlangzarh phawt ang a, chumi zawhah WR-V thar hi an tichhuak ve dawn nge tih hi media hrang hrang pawhin zawhna a nih mek thu an tarlang a. Engpawhnise, company lam thuchhuak ngaihchan rih phawt a ngai dawn a ni.