Aizawl : US Independence Day vawi 246-na, India leh United States ramte’n kum 75 chhung inlai chinna an lo neih tawh lawmna chu nimin khan Kolkata-ah neih a ni. He hunah hian Commerce & Industries Minister Dr R. Lalthangliana hian Melinda Pavek, Consul General, US Consulate, Kolkata sawmna angin a tel pui.
He hunah thu sawiin Dr R Lalthangliana chuan, Indo-US inkungkaihna chawi nun zel a pawimawh thute, USA-ah Mizo thahnemtak hna chi hrang hrang thawk an awm thute a sawi a. Mizoram atanga tul bik thil a US visa diltute lo ngai pawimawh a, lo duhsak thin turin a ngen bawk.
Lawmna inkhawm neih zawhah Dr R. Lalthangliana hi US Consul General Melinda Pavek nen inkawmin, US leh India ten kawng hrang hranga an thawhdunnate, Mizoram tana hriselna lama hma lakna tur chungchangte an sawi dun.
Minister hi Centre for Diseases Control, USAIDS, Consulate Media department leh mi pawimawh tak tak te nen inkawmin Mizoram tana hmachhawp leh thawhho zelna tur thil te an sawi bawk.
Minister hian Kolkata Mizoram House a dam lo te thingpui inna tur leh Kolkata Mizo Welfare ten a tul apianga an hman turin Rs. 10,000 ve ve a pe bawk a ni.