Thawhlehni khan Mizoram Premier League Board leh MPL Club hruaitute MFA Office-ah an inkawm khawm a, MPL season kal mek chungchang an sawiho.
MPL khelh mêk chu chhan hrang hrang avangin khelmual hman turah harsatna a awm a, fixtures siam rem a ṭul thu leh siam rem dante inhrilhfiah a ni a, club lam pawhin harsatna awmte hrethiamin inpawh takin sawihona an nei.
November 15 atangin I League khelhna turin Rajiv Gandhi Stadium hman a tul dâwn a, hetihlai vek hian Lammual lamah International Tourism Mart hman a nih dâwn avangin MPL fixtures awm sate siam rem a ni.
MPL club hruaitute hian inelna kal meka hmasawnna tur awmte leh an ngaimawh zawngte an sawi a, MPL Board lamin thil awmziate sawifiahin lungrual takin an inkawm.
MPL hi ruahman lawk ang chuan December 6-ah Rajiv Gandhi Stadium-ah final khelh tur a ni ang.
Mizoram Football Association chuan Mizoram Premier League khelh meka zan lama inkhelhnaa light chhitna senso tumsaktu tur Sports Minister Robert Romawia Royte chungah lawmthu an sawi.
MPL Season 9 hi Rajiv Gandhi Stadium, Mualpuiah lamah khelh ṭhin a ni a, he khelmualah hian light sang zawk hman a nih avangin zan lama light chhit man senso a hautak em em a, hei vang hian inkhel tam zawk hi chhunah khelh thin a ni.
MPL Board-in an harsatna neihte Sports Minister hnenah an thlen a, ani hian a senso tam zawk phuhruk turin ruahmanna a lo siam a, light chhit man senso thahnem tak a tumsak dâwn avangin MFA chuan Sports Minister Robert Romawia Royte chungah lawmthu an sawi.