Liverpool in an group hmahruaitu Napoli in tun season UEFA Champions League a hnehna an la chan vek chu an titawp a. Mahse an tan Group A-ah pakhatna nih nan a tawk chuang lo.
Anfield a inkhelah Jurgen Klopp-a pawlte hi league-ah a zawna an tlawm avangin chak ngei turin theihtawpin an tang a. Tun season a tlawm la nei lo Napoli lakah inkhel awlsam lo tak an hmachhawn.
Huntawp dawnah erawh goal hnih khungin Reds an chak a. Mohamed Salah leh Darwin Nunez ten goal khungin 2-0 in Liverpool an chak.
Liverpool hian group hmahruaitu ni turin Napoli lakah hian goal li tal a chak an mamawh. Mahse an inkhelh chhungin hei hi an tan a beiseiawm lo.
Napoli in second half-ah goal an khung hmasa zawk emaw an inti a. An defender Leo Ostigard tauh goal chu video assistant referee hmangin hun rei tak ennawn a nih hnuah offside avangin an pawm lo.
Goal hlauhawm tam lohna inkhelah minute 85-naah Salah-a’n huntha a neih a hloh lo chiang. Nunez-a’n huntawp dawn tawhah a khung belh leh bawk.
Tunhnaiah Liverpool tlarhnung phui lo avangin an mualpho leh thin a, mahse hei pawh hi Reds in a chhanna an nei dawn niin a lang. Defender Ibrahima Konate inhliam dam tawhin Napoli tlarhnung lakah a ding nghet.
Liverpool manager Jurgen Klopp chuan, “Goal luh hma pawh khan inkhel hmuhnawm tak niin ka hria. Zaninah tunhnaia kan result chhe thin chu siamthat kan duh tih kan lantir a, tangrual taka kan din khawm tlat theih kha kan chakna a ni.” tiin a naute inkhel a fak.