YMA Sub. Hqrs, Lunglei in Aizawl – Thenzawl – Lunglei (ATL) Road chhia siam that phuta lungawi lohna an lantir kal zelah Lunglei bawrhsap leh PWD lamin an ngen angin November 5, 2022 thleng ngaihchan an rel.
Thawhlehni zan khan ATL Road chhia siam that phuta an hmalak zel dan tur relin YMA Sub. Hqrs, Lunglei SEC thutkhawm hmanhmawh chu an pisa-ah an nei a. Thawhlehni chhuna bawrhsapin Bhavya company aiawhte a kawm hnuah company-in theihtawpa hmalak an tum thu an sawi thu te, PWD leh company inkara hmalakna awm mek hi ngaichang tura a ngen avang leh PWD pawhin an hun tiam thleng chauh hi ngaichang tura YMA an ngen bawk avangin ngaihchan leh phawt an rel a ni.
YMA Sub. Hqrs Lunglei chuan PWD, Lungleiin Bhavya hnena kawng siam that hna thawka hma la tura an ngen angin an hmalaknate hi November 5, 2022 thleng an ngaihchan tur thu an sawi a. PWD leh Bhavya inkara hun tiam chhunga duhthusam hmalakna a awm leh awm loh an vil zui zel dawn nia sawiin, an hmalakna leh thawk tura an beisei ang an hmu lo a nih chuan an security deposit hmanga a theih dan anga kawng siam that dan an dap dawn niin an sawi.