Party policy chungchanga debate neihpuia party dang te lo cho tawhtu PC party President Vanlalruata’n political party dang policy chu a rintlak loh nia sawiin, party dang te chuan policy chungchanga debate neih puiah pawh an cho lo niin a sawi.
Vanlalruata chuan nimin khan Kolasib-ah thuthar thehdarhtute kawmin he thu hi sawiin, Mizoram a political party dang te chu policy rintlak nei lovah leh policy debate-a cho lovah a puh a. “Kan ramin hma a sawn theihna tur policy chu kan policy hi a ni” a ti.
PC party President Vanlalruata chuan “Party dang policy ho chu an rintlak loh,” tiin, “party dang chu- an policy tha awm tâk, belhchiana rintlak si loh an aupui a, mipuiin thudik an hriat theih nan October ni 13, 2022 khan party dang te chu policy debate neihpuiah ka cho hlawm a, tun thlengin min chhang ngam an awm lo” tiin, hei hian party dang policy rintlakloh zia a tichiang niin a sawi a ni.