Zai intihsiakna ngaihhlut hlawh tak Praise On 2022 zinkawng a thui a, a hmawr an bawk chho tan a; finalist mi 10 te pawh pakhatna nia Rs 1,00,000 hlawh chhuah tumin ngawrh takin an inbuatsaih chho mek.
September ni 26, 2022 atanga neih tan Branch KTP malzai intihsiakna chu a hmawr bawk chho tanin, final round chu November ni 8 leh 17, 2022-ah Mission Vengthlang Presbyterian Kohhran Golden Jubilee Hall-ah neih a ni dawn a. Top 10 te inelna zai hi live music hmanga rem a ni tawh dawn a, an zai remsaktu tur house band te nen Ramhlun Presbyterian Kohhran Jam Room-ah ngawrh takin hla an zir thin.
Top 20-a inhlangkai zingah hmeichhia an tam zawk a, intihsiakna hautak zawk hmachhawn tura tling zingah pawh hmeichhia an la tam. Mi 10 zinga mi 4 te chu Aizawl khawpui pawn lam mi niin, midang 6 te Aizawl khawpui chhung branch 6 aiawhte an ni.
Praise on 2022 finalists:
- Lalramnunmawii
Durtlang nula ‘Mawitei’ tia koh niin, tuntum hi zaia inelnaa a tel vawikhatna a ni chungin, rimawi khawvelah erawh a mikhual lo. Durtlang pastor bial zaipawl member nilai, aw control thiam tak, judge ten ‘I zai puitling’ an tih thin a ni. Elimination round-ah Kristian Hlabu ami ‘Zual zelin ka fak chak hle che’ tih chu R&B lam rawngkaiin a sa a, intihsiakna sang zawkah Soul lam a uar chho ta thung. A aw control kual velin ngainat leh thiam tih a hlawh a, Judge zinga mi Mavuana pawhin, “I zai hi, i aw in min ko an tih tur ang chi hi a ni,” a ti hial, social media lamah a tantute thawm a ring hle.
- Lalhriatkimi
Musical instrument khawih thiam deuh vek ‘Kimkimi’ tia koh hi Kolasib Diakkawn nula a ni a. Aizawl-ah college kalin a awm mek thung. Second round-ah ‘Ka beisei Isua’ tih hla sain, keyboard hmangin a zai a rem a, mipui ngaihven a hlawh phah hle. Kum 5 mi a nih atangin mipui hmaah a zai tan a, sunday sikul atanga bultanin branch KTP programe hrang hrangah zai chho zelin, 2013-a CZS Kolasib-in solo competition a buatsaihah khan pahnihna a ni.
- R. Lalnuntluangi
Top 10 zinga naupang fal, Tluang Tluangi hi Laipuitlang, Aizawla cheng niin, kum 5 mi a nih atangin sunday sikul-ah a zai tan a, a school luhnaah te pawh zai fo mahse, tuntum hi zai inelnaa a tel vawikhatna a ni thung. A aw mil tur hla a thlang thiam hle a, elimination round atanga top 20 round inkarah Genre hrang hrang hrut kualin, Jazz lam a inhmeh zual bik emaw tih tur a ni. Top 20 round-a a zai zawhin Judge zing ami Stacy-i chuan, “I aw tone mawi zia hi aw, i zai a ngaihnawm em em” tiin a comment a, Mavuana’n chhunzawmin, “I aw ri hian min hneh a, aw tone mawi tak nei i ni a, a hmul thep a, a tham deuh bawk si,” a ti.
- R. Lalmuanpuia
Rengdil tlangval Muanpuia hi ‘Aw thunun hneh, aw thlep kual vel thiam’ tia Judge te fak thin a ni a. LPS vision production-in kum 2019-a ‘Youth Icon’ an buatsaihah khan top 50 thleng a inhlangkai tawh. Tuntumah hian Top 20 round-ah khan Lalruatfeli (Maipuii) hla phuah leh sak lar ‘Trinity’ sain, a thiam hle a; judge te pawhin a hla sak chu an huphurhpui aia a sakthat thu an sawi chhuak hial. R&B lam a thiamnal bik deuha ngaih ni mahse, genre dang hymn, country leh soul lam pawh a thiam em em tho bawk.
- Malsawmdawngzuali
Tlangnuam West branch KTP member Mali hi Praise On-ah hian mikhual a ni lo, kum 2016-ah khan a lo tel tawh. “Aw pui taka zai hem hem chi” tia judge te fak Mali hian top 20 round-ah khan Kristian Hlabu 132 na ‘Enge ka rilru a mangan’ tih hla a sa a, judge te lung a dum hle a nih kha. Judge zing ami Zothanmawia’n ‘I zai a ngaihnawm, Isua pawh a lawm ka ring,” tiin a fak hial. Beginners department zirlai a nih atangin mipui hmaah a zai tan a, Zoram mipuiin a zai kan la ngainat chhoh zel a rinawm.
- Gloria Laldinsangi
Intihsiakna neih a niha Gloria-i a rawn lanin thawm a awm hak zel, an branch ten an tawiawm tha a; a zai ngainatu an tam. Dawrpui Vengthar nula Gloria hi Beginners department zirlai a nih atangin mipui hmaah a zai tan a, zai intihsiaknaah erawh tuntum hi a vawikhat telna a ni. Judge ten “Nang hi chu ‘Artist’ i ni” an tih hian lem ziah a tui a, rimawi hmanrua Guitar leh Keyboard a tum thiam bawk a. Gloria hi a aw a danglam a, aw tlanglawn lo tak mai nei a ni.
- Jessica Lalhmangaihtluangi
Mizoram chhim lam atanga Praise On 2022 top 10-a inhlangkai awmchhun Jessica-i hi Lunglawn, Lunglei-a cheng niin, Lunglei Chanmari pastor bial zaipawl member nilai a ni. ‘A zai nung’ tia sawi thin niin, Judge zing ami Stacy-i’n “I zaiah hian tinungtu a awm tlat thin, min ti kang tlat zel,” tiin a comment hial. Top 20 round-ah khan ‘No longer a slave to fear’ tih hla Mizo tawnga lehlin a sa a, a aw danglam mawi tak nen a hla thlan hi a inhmeh hle. Round a san chhoh zel angin a zai pawh a tha chho telh telh a, hmasawn ber te zinga mi a ni.
- Isaac Lalthazuala
‘Saka’ tia an koh, Chanmari West Hmar Veng tlangval hi Primary department zirlai a nih laiin group singing-ah telh a ni a, kum 2015 atangin a malin a zai tan. Chanmari West pastor bial zaipawl-ah tel mekin, tenor part a sa. Top 20 round-ah khan music track nen zaiin, ‘Joyful Joyful we adore thee’ tih hla Mizo tawnga lehlin a sa a, a zai zawha Judge ten an sawizuinaah Satcy-i’n intihsiaknaa tel ve dang te aia a danglamna hrilhin, “Soul hran hi i nei a, chu chu midang laka i danglamna,” tiin. Saka hi musical man tak a ni a, head voice a hmang thiamin, a ngaihnawm thin hle.
- R. Remsangpuia
‘Gospel Rocker’ tia koh fiam, Rsp-a hi Chanmari West Branch KTP-a Group office bearer nilai a ni a. Mizorama band contest ngaihhlut hlawh takah te pawh an Band-in pakhatna dinhmun an lo luah tawh a, rimawi khawvelah mikhual a ni lo. Mipa aw lian tha tak, zai hluah hluah thin a ni. A zaithiam piahlamah a stage perfomance chu Judge te duh rawn chhan a ni. A thiante nena band an dinah lo zai fo tawh thin mahse, mal zaia inelna erawh a la hmachhawn tam lo thung.
- Vesper Lalrinawma
KTP Saitual branch-a committee member nilai, bial zaipawla tel mek Vesper-a hi Gospel band tha tak ‘Fall Profane’ vocalist a ni. Top 20 round-ah khan Israel-a Pachuau hla ‘Krista tan’ tih hla a sa a, a ngaihnawm teh e. ‘Gospel Rocker’ tia sawi theih tho Vesper-a hi a aw a danglam mawi em em a, judge ten comment an pek pawhin ‘a aw danglam na’ an sawi chhuak thin, Stacy-i chuan,”I aw i sawizawi hneh lutuk hian min hneh,” tiin a fak hial.