President Droupadi Murmu-i’n ni hnih cham turin vawiinah Mizoram a thleng dawn a, MZU Convocation a hmanpui bakah naktuka Legislative Assembly Session a hmanpui bawk ang.
Ruahman lawk dan chuan president hian vawiin chawhnu dar 1-ah Lengpui Airport a thleng dawn a, helicopter hmangin MZU Campus a pan ang a, convocation a hmanpui ang.
Hemi bakah hian state leh sorkar laipui kaltlanga hmasawnna hnathawhna tur project lungphumte a phum ang a. Tlai lamah MZU-a hmeichhe zirlaite nen an inkawm ang a, zanah Raj Bhavan-ah hun a hmang ang.
Zirtawpniah Legislative Assembly special session neihah President Murmu-i chuan thu a sawi ang a, hemi ni vek hian Aizawl a chhuahsan leh nghal dawn a ni.
President lo zin tur chungchangah hian Aizawl bawrhsap chuan mipuite hriat tur thuchhuah a siam a, November 3-4 chhungin Lengpui, Sairang, ITI Mualpui, Mizoram University, Pachhunga University College leh Raj Bhavan chungah te remote control hmang drone aerial camera leh hetiang lam chi reng reng thlawh phal a ni lo a, thupek bawhchhia an awm a nih chuan an drone/aerial camera-te man/kahthlaksak a ni ang a, an chungah dan angin hremna lek a ni ang.
President-in Aizawl a cham chhunga a chetvelna tibahlah thei tur ven nan Aizawl Traffic SP chuan Aizawl khawpuia lirthei tlan dan tur ruahmanna a siam a, Traffic SP Rodingliana Chawngthu chuan tukin dar 6 atanga tlai dar 6 inkarah Mizoram University atanga Raj Bhavan inkar – Tanhril, Sakawrtuichhun, Tuivamit, Chawlhhmun, Luangmual, Vaivakawn, Dawrpui Vengthar, Dinthar, Tuikual North leh Tuikual South kawngpui dungah te lirthei leh bungrua engmah dah phal a ni lo tih a sawi.
Zanin dar 9 atanga Zirtawpni chhun dar 12:30 inkarah Thuampui Helipad atanga Raj Bhavan inkar – Venghlui, Dawrpui, Zarkawt, Chanmari, Chaltlang, Bawngkawn leh Thuampui huam chhung kawngpui dungah president chetvelna tibahlah thei lirthei leh bungrua engmah dah phal a ni lo tih a sawi bawk.
President a veivah chhungin kawngpui leh kawng pengthuam dan a ni dawn a, lirthei tlan laite pawh kawngpui atangin kawng pengthuamah tlantir tur a nih thu sawiin, tluang taka president a veivah theih nan lirtheite pawh ni dang aia rei din a ngai dawn tih a sawi a; lirtheia veivakten hriat lohna avanga buaina an tawh lohna tur leh tul lova hun an sen thlawn loh nana lo inhmakhuaa pumpelh dan kawng zawng turin mipui a ngen.