Kar kalta Inrinni tlaia Tuirial Airfield Venga tank lorry kang avanga hliam tuar zinga mi pakhat chu nimin zinga khan ZMC-ah a thi a, mi panga an thi ta.
Tuirial Branch YMA hruaituten The Zozam Times an hrilh danin, tank lorry kang avanga hliam tuar zinga mi – Moses Lalrintluana h/o Zatlingpuii chu tukin dar 4:30 khan Zoram Medical College-ah a thi a, nimin vek khan vui a ni.
Moses-a hi a kan tirah Civil Hospital, Aizawlah dah phawt a ni a, a hnuah ZMC-ah hian dah a ni a, a taksa zaa 90 lai a kang chhia a ni.
Tank lorry kang avang khan Tuirial chhunga cheng mi eng emaw zatin hliam tuarin damdawi ina enkawl mek an la ni a, mi pahnih, Tuirial veng leh Airfield venga mite chu an dinhmun a tha lo zual niin YMA hruaitute chuan sawiin, ICU-ah enkawl mek an ni.
Tar lan tawh thin angin tuialhthei phur, Champhai lam pan chu Inrinni tlai dar 3 vel khan Tuirial Airfield-ah a che sual a, tanker atanga tuialhthei put chu a bul hnaia cheng leh kawng kalten an dawh a, tlai dar 6 vel khan tanker hi a kang ta a, a hmunah mi pali kang hlumin mi thahnem tak hliam tuar an awm a, kangmei chhuak avang hian chenna in pakhat, taxi pakhat leh scooty pathum a kang chhe bawk a ni.