Aizawl : Mimbung khuaa VC House, Panchayat Bhawan ni bawk leh MzSRLM hnuaia self help group intelkhawm, Village organisation (VO) office sak thar te chu nimin khan Addl. DC, Saitual, DRDO Project Director ni bawk Margaret Lalrinawmi Fanai-in a hawng.
Addl. DC chuan Mimbung khua chu ramri hrula awm, Mizoram hmel lanna darthlalang pakhat a nih thu sawiin, ramri vengtu pawimawh tak an nih thu a sawi a. Hun lo kal zel turah sorkar hmalakna hrang hrang lo thawhpuia, lo tawiawm tur te, taima taka mahni hmazawna tih tur awm te hlen chhunzawm zel tur leh ruihhlo, a bikin Heroin (No.4) do kawngah theihtawp chhuah chhunzawm zel turin kalkhawm te chu a sawm bawk.
Mimbung VCP Than- ghuliana kaihhruai inkhawmah hian VC Secretary Ginsuanlian leh VO secretary Dengropari ten report an pe a bawk.
Panchayat Bhawan hi Local administrstion department hnuai, XV Finance commission grant aṭanga Rs. nuai 10 hmuh leh MGNREGS aṭanga Rs. nuai 10 hmuh hmanga convergence a sak a nih thu sorkar thuchhuah chuan a tarlang a. Village Organisation office erawh chu Sialkal Range Development Council sum Rs. nuai 5 hmanga sak a nih thu a tarlang bawk a ni.