Aizawl: MZP hruaituten Home Minister Lalchamliana hmuin Lengpui Airport leh Mizoram hmun hrang hranga Inner Line Permit (ILP) endikna hmunahte Zohnahthlak, Mizoram state pawn atanga Mizorama lut turte tihluihna hmanga ILP phuta endiksak tumna a awm thin thu leh tha lo an tih thu an hrilh.
MZP hruaitute chuan MZP-in Zofate inpumkhatna leh insuihkhawm an ngaih pawimawh thu home minister chu hrilhin, hemi kawnga hma an lak mek laia Zohnahthlak, Mizoram thenawm atanga zinten Lengpui Airport leh Mizoram hmun hrang hranga ILP avanga harsatna tawka ILP siam luihtir an ni chu hriatthiam har an tih thu an hrilh a. Zohnahthlakte ngei, hnam dang ang maia ILP hmanga harsatna siamsak an ni chu thawktute inthlahdah vanga an ngaih thu leh home department pawh a mawhphurtua an ngaih thu bakah unau hmelhai a thlen palh an hlauh thu an hrilh.
Home Minister Lalchamliana chuan a hnena MZP hruaitute thu thlen chungchang hi a ngaih pawimawh thu leh hma lak nghal a nih tur thu a lo hrilh niin MZP hruaitute chuan an sawi a. Khawvel hmun hrang hranga Zofate inpumkhatna tha zawk a awm theihna turin Zohnam inkhawmpui lian (ZOFEST) pawh kumin December thla chawhma lama buatsaih an tum thu an sawi bawk.