Chhhul-hmawr hi vawi leh khatah a cancer thut ngai lova, natna avangin zawi zawiin a nihphung a inthlak danglam a, cancer meuh tur chuan hun leh nihphung danglam tam tak a paltlang thina ni.
Chutianga a kalkawng chu tehna mumal taka teh niin Cervical Dysplasia emaw Cervival Intraepithelial Neoplasia (CIN tiin kan sawi zui ang) tiin a danglam chhoh dan ang zelin CIN-1, CIN-2 leh CIN-3-ah te then a ni a, CIN-3 thleng a han nih tawh hi chuan, chutianga CIN-3 ni tawh zawng zawng 50% zet chu kum 10 chhungin chhulhmawr cancer nasa takah a chang tawh thin a ni.
HPV lakah chuan kan him thei em?
HPV laka invenna (vaccine) siam a lo ni ta leh zel a, India ramah pawh vaccine chi hnih ‘ Bivalent’ leh ‘Quadrivalent’ an tih te chu kum 2004 leh kum 2002 atang khan kan lo hmang tan ve thei ta a ni.
He invenna hmang miah lo hmeichhiate hian HPV kai theihna hi kan damchhungin 80% zet kan nei kan tih tawh kha. Amaherawhchu, invenna (Bivalent Vaccine) hi tum thum (0,1&6 Months) lak a nih chuan HPV 16 leh HPV 18, cancer thlen duh deuh ber kan tih lakah khan kan fihlim thei a. Invenna tho (Quadrivalent Vaccine)-ah thung chuan tum thum (0,2&6 months) lak hian HPV 16, 18, 6 leh 11 laka kan him theih mai bakah mipat hmeichhiatna atanga kai chi natna chikhat serh leh a vela singsihlit (Genital warts) ang tak lakah pawh kan him theih phah a ni.
HPV Vaccine chuan eng chen nge a ven:
HPV Vaccine hi a him Thain a chhe zawnga nghawng dang a neih sawi tur a vang hle a, amaherawhchu he invenna hi pek emaw lak emaw hmain HPV kai leh kai loh hriat chian hmasak ngei ngei tur a ni. HPV la kai lo chiang balin he invenna hi a la anih chuan kum 8 chhung tal chu CIN 2 leh CIN 3 thlentu HPV-16 leh HPV-18 lakah 100% in a him tura ngaih a ni.
Kum 2007 atang khan Dose maktaduai 2,500 lai pek a lo ni tawh a, India ramah ngei pawh Punjab leh Delhi-ah te phei chuan kum 2016 atang khan mipui nawlpui vaccine (National Immunization Schedule)-ah an lo telh daih tawh a ni.
Engpawh nise, kan khawtlang nun leh ei bar zawnna kawnga kan changkan lehzual hun, hmeichhiate tihchak an nih a, inentir a, hriatchhuah hma a, inenkawlna kan uar hunah chuan hmeichhiate nasa taka tiretheia suat mektu natna, chhul-hmawr cancer hi kan la umbo ngei ang.