Kan hnam hian inthlahpun kan mamawh telh telh dawn
Mizorama kohhran member zuitu ngah ber Mizoram Presbyterian kohhran hmeichhe rorelna sang chuan fa nei tam tura inzirtirna neih an rel a, tam kan ngai pawimawh chho leh tan dawn a ang hle.
Kan hriat angin Mizote hi hnam tlem kan ni a, kan chhehvelah hnam hrang hrang awmin, anni ho hian inthlahpun an uar a, tam na na na chuan huai hun an la nei ngei dawn. Chutiang thleng chuan kan ngaihtuah tel chhoh a ngai tawh hle.
Kan ram a zau tawk lohzia kan aupui fo a, chumi zau tawk lo pawh chu min chuh buaitu an awm chho ve reng bawk. Ramri vanga buai hun kan la nei chho zel lovang tih a sawi theih loh a; chuvang chuan engkimah kan hnam hi kan tam a ngai.
Kum 10 liamta khan Mizoram a pressure group lian ber MZP chuan fa nei tam tura inzirtirna hi an rorelna sangah an lo passed tawh a, midangin an zui ve lawk lova a lan hnuah tunah kohhran hmeichhe lamin an lokalpui ve leh dawn tan nia lang hi a lawmawm lamah i ngai phawt ang.
Kohhran hmeichhe rorel inkhawmah hian Chhinga Veng Pastor bial atanga rawtna lut ‘Fa neih tam tura inzirtirna neih ni rawh se’ tih chu pawm a ni ta a, Central committee bawhzui tura dah a ni. Anni hian engtinnge an rawn bawhzui ang hriat la ni lo mah se, kan hnam hian tam kan mamawh a, kan tu leh fate leh tuchhuante tan pawh tun atanga tam tura kan lo inzirtir lawk hi a ngai hle a ni.