Round 10 inkhel hmasa berah Electric Veng FC in tun season a vawi hnihna atan chauh hnehna an chang a. Chanmari FC lakah 2-0 a chakin Zote Honda Mizoram Premier League table mawngphah an chhuahsan.
Ningani a Rajiv Gandhi Stadium a inkhelah Electric Veng in second half-ah Jonathan Lalrawngbawla hmangin goal an khung a. Huntawp dawnah Vanlalremkima chuan an goal hnihna a khung.
Tun season-ah team pahnihte an intawn vawi thumna a ni a, a hmasa pahnihah Chanmari FC chak mahse Electric Veng FC in hnehna pawimawh in an chhanglet a. Table-ah dinhmun an inthlak thleng.
Inkhel hnuhnung zawkah FC Bethlehem in che tha FC Venghnuai an chelh a, goal inpe lovin an inhnehtawk.
Venghnuai in tlarhmaah striker Lalrammuanpuia an chhawr thei lo chu an tuar a, hlauhawm siam thin mahse a hmawr an bawk thei lo.