Scottish champion Celtic in UEFA Champions League group stage chu chak hmel hmu miah lovin an khar a. Real Madrid nen inkhelin goal nga an chhuah.
Group F a inkhel hnuhnungah Santiago Bernabeu-ah Celtic an inlan a, minute 21 chhungin goal hnih an chhuah nghal.
Handball vawi hnih avangin penalty atangin Luka Modric leh Rodrygo ten goal an khung a. Lehlamah Celtic in penalty an hmuh chu Josip Juranovic chuan a khung lo.
Marco Asensio leh Vinicius Junior ten Spanish champion tan goal khung belhin tunlaia midfielder che tha bera mi tam takin an chhal Federico Valverde chuan an goal hnuhnung ber a khung a, goal dangah a inrawlh hnem hle. Celtic tan Jota chuan freekick vawikhat a khung ve bawk.
Real Madrid coach Carlo Ancelotti chuan, “Kan match hmasa lamah kan khelh that loh avangin zaninah tha taka khelh kan duh. Celtic khan min rawn beih let theihna huntha kha an nei a, mahse penalty an khung loh kha an tan a pawi. Keini lamin chetsual kan tum lo em a, hnehna kan chan theih phah ta reng a ni.” tiin inkhel zawhah a sawi.
Group F inkhel dangah RB Leipzig in an mamawh hnehna chiang takin an chang a, round of 16 a an hmun an tichiang.
Warsaw-ah Shakhtar Donetsk nen German club hi an inkhel a, Shakhtar hian hnehna chang se pahnihna nih inbeiseina an la nei.
Mahse Leipzig tan Christopher Nkunku chuan goal hmahruai a khung hnuah Andre Silva, Dominik Szoboszlai leh Dani Olmo ten goal an khung a, 4-0 in chiang takin an chak.