Aizawl: President Droupadi Murmu-i chuan zan khat riak turin nimin khan Mizoram a thleng a, Mizoram University (MZU) convocation vawi 17-na a hmanpui bakah MZU hnuaia college hrang hrang building sak tharte a rualin a hawng bawk.
Murmu-i chuan nimin chawhnu dar 1:47 khan Lengpui Aiport thlengin, thlawhna tumhmunah hian Larsap Dr. Hari Babu Kambhampati leh Chief Minister Zoramthanga ten lo dawngsawngin, Indian Army 246 Field Regiment Artillery-ten Guard of Honor an pek hnuah MZU pan nghalin, convocation a hmanpui nghal.
President chuan India ram unversity tha zual 100 NIRF-in a thlan chhuahah MZU-in ranking sang tak a nei chu ropui a tih thu leh unversity tha tehnaah sang chho zel turin theihna a nei tih a sawi a, MZU chu a hmuhma a nuam a, ramngaw hnuaiah zirna in tha tak tak a awm belh zel a, campus chhunga hmalakna chu eco-friendly/environmemt friendly ni zel se duhthusam a nih thu a sawi.
MZU-in research lamah hmasawn zel tuma theihtawp a chhuah leh technical education bakah skill development lamahte tan a la zel chu tha a tih thu a sawi a bawk.
Tun tum convocation-ah zirla titha filawr thlanchhuah zingah hmeichhia an tam chu ropui a tih thu president chuan sawiin, kawng tinrengah hmeichhiate hmasawnna tur ngaihtuah a ngai a, India ramah hmeichhiaten hma an sawn a, hmeichhe dinhmun a that chhoh zel chuan India in nasa takin hma a sawn ang tih a sawi.
MZU convocation-ah hian Larsap Dr Kambhampati, Chief Rector of Mizoram University leh chief minister chu khualzahawm an ni a; degree, gold medal leh prize dawngtu mi 6,826 an awm a, a hmuna degree hlan hi mi 838 an ni.
Murmu-i convocation a hmanpui zawhah MZU atang vekin Aizawl Government College, Mualpui Campus chhunga Rs vaibelchhe 12 senga sak, Administrative and Academic buildings te, Pachhunga University College chhunga Rs nuai 456.64 senga sak Cluster of Academic Blocks te, Rs nuai 350 senga Tribal Girl Students’ Hostel building sak thar leh Rs nuai 350 senga Rural Tribal Girls’ Hostel building thar, Sairang a mite a rualin a hawng.
Hemi bakah hian Rs vaibelchhe 25 senga sak, Indian Institute of Mass Communication (IIMC) : North Eastern Regional Campus a hawng bawk.
Building an hawn tak central sawkar sak, central leh state sawrkar tangkawpa sakte chu Mizoram chhunga zirna atan pawha hmasawnna liantham tling a nih thu a sawi a, journalism zirna IIMC campus siam belh hian India hmarchhak biala media leh journalism tan hmasawnna a thlen dawn tih a sawi bawk.
Heng hunah hian Assembly Speaker Lalrinliana Sailo, Minister Dr R.Lalthangliana, C.Lalrinsanga leh Minister of State Lalchhandam Ralte, Dr K.Beichhua, Robert Romawia Royte leh MLA eng emaw zat an tel a ni.