Aizawl: MJA General Headquarters chuan nimin khan Aizawl Press Club-ah Defence Study Tour report leh MJA member-in award a dawn lawmpuina inkhawm an buatsaih.
Inkhawm hi MJA Gen. Hqrs vice president Lalremsiama’n a kaihhruai a; Defence Study Tour-a kal zinga mi, Zonunsanga Khiangte, MJA president hlui leh K Zothanpara, Secretary, MJA Gen. Hqrs ten zin chanchin an sawi.
Defence Study Tour hi defence ministry buatsaih niin September 13-21, 2022 chhung khan neih a ni a, MJA member Aizawla mi pali leh district-a mi pasarih, an vaiin mi 11 chuan Assam leh Arunachal Pradesh-a Indian Air Force leh army hmunte an tlawh a ni.
MJA Gen. Hqrs President C Lalrambuatsaiha’n Henry L Khozol, editorial consultant/correspondent, Press Trust of India hnenah India ram pum huap award a dawn avanga chawimawina leh lawmpuina a hlan. Lawmpuina hian thuchei leh Rs 10,000 a keng.
September 22, 2022 khan Henry L Khozol hian Federation of Indian Chambers of Commerce and Industry (FICCI) atangin hna thawk tha lawmman, ‘Excellence in journalistic reporting on smuggling and counterfieting issue’ ah lawmman pakhatna a dawng a ni.