Mizoram Pradesh Youth Congress Committee (MPYCC) chuan nimin khan social media hman dan inzirtirin party thu leh hla puanzar kawngah fimkhur tak chunga thahnemngai taka hmalak dan turte an sawiho.
MPYCC Room-a ‘Social Media Training’ buatsaihah thu sawiin Congress Thalai President Dr Lalmalsawma Nghaka chuan social media-a thu an post reng rengin tawngkam dik leh hawihhawm tak hman thin a pawimawh tih sawiin, “Thu dik leh rintlak chauh kan sawi thin tur a ni. Thu dik post turin account lem neih a ngai lo,” a ti.
Tun lai social media-ah party thenkhat mi leh sa thahnemngaiin Facebook, Instagram, Twitter leh Whatsapp-ah account lem nena an party bei thin an awm tih sawiin, “Hetiang hi mi dawihzep leh mi puh hmingchhiat duhtute thil tih a ni thin,” tih a sawi a, Congress thalaite erawh thu dik leh rintlak chauh sawi a, fake account neih a tulna a awm loh thu a sawi.
Congress Thalai president hian MNF leh Congress sorkar buktawnin an indanglam hleih niin a sawi a. Congress chu an thutiamah an din thin thu leh tih tur nia an sawi chu an tihlawhtling thin a, an inrinawm hleih tih sawiin, Congress chu a chhe lai siam thatu an nih thu a sawi.