Pakistan prime minister hlui, Imran Khan chu an ram khawchhak lam, Wazirabad-a thil duh lohna lantira kawng zawhnaa a telnaah kah niin a ke-ah hliam a tuar.
A thawhpui hlun tak pakhat chuan ‘thah tumna ngei’ a nih thu AFP news agency hnenah a sawi a, police erawh chuan hetiang hi a ni ngei tih an la sawi ve lo thung.
Silai puakah hian Khan-a party mi parukin hliam an tuar bawk tih PTI party chuan an sawi a, an zingah hian politician ve tho, Faisal Javed Khan pawh a tel.
Kum 70 mi, Khan-a hian an khawpui, Islamabad panin April thlaa thuneitu a nihna atanga paih a nih hnuah inthlan that phutin kawng a lo zawh tawh bawk.
Social media-a video thehdarhah chuan Khan-a hi a ke ding lamah hliam tuarin lirtheiah dah luh a ni.
PTI member pakhatin social media-a video a dahah chuan hmai leh kawra thisen kai hnuanga awm chungin Khan-a leh hliam tuar dangte tana tawngtai turin a ngen lai a lang.
Prime minister hlui hi Lahore-a damdawi inah lak nghal a ni a. An party thupuangtu chuan a ngalah kah a nih thu a sawi.
An party hruaitu dang, provincial health minister Yasmeen Rashid, chuan Khan-a hi ngaihtuahawm a nih loh thu a sawi ve bawk.
Silai a puah hnuah hian a titu nia rinhlelh mipa pakhat man a ni tih Pakistan-a Geo TV chuan a puang a. Tunge a nih puan a la ni lo va, eng pawl mahin an tihah an la chhal lo bawk.
Prime Minister Shehbaz Sharif chuan he thil thleng hi a dem tak zet thu a sawi nghal a, thuneitute chu fel fai taka chhui turin thupek a pe nghal.
Khan-a hian October 28 atang khan Lahore atangin kawng zawh hi tanin Islamabad chu November 11-a thleng tura inruahman a ni a. Hetiang kawng zawh hi kumina a vawi hnih huaihawtna a ni tawh nghe nghe.
Thla hmasa khan Pakistan-a election commission chuan Khan-a hi vantlang pisa luah thei rih lo turin a hrem a, hei hi cricketer hlui hian politics thila a chunga phiarna leh phuba lakna mai a nih thu a sawi.
Khan-a hi ram dang mite hnen atangin dik lo takin thil pek a dawng nasa nia sawi a ni a, chung thil pekte chu a hralh leh thin bawk nia puh a ni a. Thil pek a dawn zingah hian Rolex sana, zungbun leh thil hlu dangte pawh a tel.