Aizawl : Mizoram Deputy Chief Minister hlui, nimina vuiliam tak Lalhmingthanga chu party hrang hrang ten an ui thu thuchhuah siamin an tarlng hlawm a. MNF party chuan an party adviser nilai Lalhmingthanga’n chatuan ram a pan ta mai chu pawi an tih thu leh an ui thu sawiin, a kalsan a nupui fanau, tu leh fa te an tawrhpui thu leh Pathianin thlamuanna an duhsak thu an tarlang.
MNF party chuan Lalhmingthanga MNF party tana a thawhrimnate, Mizoram leh hnam tana theihtawp a lo chhuah tawhnate an chhuan thu tarlangin. an hriat reng tawh tur thu an tarlang bawk. Lalhmingthanga vuinaah hian MNF party aiawhin Sr. Vice President, Dy. Chief Minister Tawnluia’n thu a sawi a ni.
PC party pawhin PC party sorkara Minister lo ni thin Lalhmingthanga chu an ui thu leh an sun thu thuchhuah siamin an tarlang a. A thatlai hun zawng zawnga PC party leh Mizoram ram tana a finna, thiamna leh theihna zawng zawng hlantu a nih thu sawiin, sul a lo zut tawhna zawng zawng te chu ram siamthat nan an vawng nung zel dawn tih sawiin, a chhungte zawng zawng an tawrhpui thu an sawi bawk.
BJP pawhin Dy Chief Minister hlui chatuan ram pan ta chu an ui thu leh a kalsan a chhung te zawng zawng an tawrhpui thu nimin khan thuchhuah siamin an tarlang a. “Mizoram tan pawh hetiang mibik kan chan hi channa nasa tak a ni” an ti.
Dy CM hluiin Mizoram tana rawng a lo bawl tawhna te chu hriat reng a ni tawh dawn tih sa- wiin, “Mizo ten politician kan neih zinga chhuanawm tak, ram tana a theihna nasa taka hlantu kan chan hi pawi kan ti hle” an ti bawk.