Vairengte leh Sairang inkar kawngpui siamna atana an ram laksak neitu intelkhawm, Land Owners Association chuan Mizoram ei leh bar lak luhna, Vairengte-ah kawng an dang a. Kawng dan hi vawiinah chhunzawm an la tum.
Land Owners Association hian nimin zing dar 6 atangin NH 6 & 306 kawngpui zauhna tura ram laksak avanga zangnadawmna pe chhuak thuai tura sorkar phut nana lungawi lohna lantirin Vairengte daia mi mal kudam behchhanin kawngpui hi an dang chat a. He thu buatsaih a nih lai thleng hian boruak duhawm lo thleng a awm lo.
Vairengte Police Check Gate atanga thu dawn danin nimin tlai dar 5:40 thleng khan state pawn atanga Mizoram lo lut tur lirthei an awm lo a. Mizoram chhuahsan tur lirthei erawh dan pangngaiin a kal reng thung.
Mizoram rawn luh tum bungraw phur lirthei lian panga – LPG, bungraw phur Ashok Leyland leh tripper truck pakhat theuh bakah long platform truck (LPT) pahnih chu harsatna tawh palh venthawnpuina avanga ding tura ngen an nih angin an ding mek.
Land Owners hruaitute hnen atanga The Zozam Times thu dawn danin, kawngpui dang chat turin mi 700-800 inkar vel an thawk chhuak a. Nizan lamah duty-na hmuna riahchilh tur thahnem tak an kal khawm bawk.
Hetih lai hian lungawi lohna lantira kawngpui an dan hi sorkar lam beng pawh a thleng tawh nia an hriat thu an sawi a. Chutih laiin sorkar lam atanga thu lawmawm an la dawn loh avangin danchah chhunzawm zel an la tum thu an sawi.
He four-lane kawngpui siam turah hian zangnadawmna pek chhuak mai theih tawh a nih lai leh, mi 30 vel hnenah pek chhuah tawh a nih laiin Mizoram forest department chuan harsatna an siam chu pawi an tih thu leh hriatthiam harsa an tih thu an sawi a. Zangnadawmna atana sem tur sum pawh CALA leh NHIDCL joint account-ah a awm vek tawh laia ram neitute harsatna siamsaka sorkar leh thuneitute hnenah an harsatna chin felpui tura vawi tam tak an thlen hnuah pawh ngaihsak an hlawh loh avangin, an thiam ang angin hma an la ta mai niin an sawi bawk.