Arsenal in Europa League knockout stage an khelh hunah round of 16 atangin bul an tan dawn a. Ningani zanah FC Zurich lakah hnehna changin an dinhmun an tichiang.
Gunners hian Emirates Stadium-ah Swiss club hi an mikhual a. Kieran Tierney-a’n metre 22 atanga kawh taka a pet goal hmangin 1-0 in an chak a. Group A-ah point hnih a changin hmahruaitu an ni.
Premier League hmahruaitu hian inelna hrang hrangah match 12 atanga vawi 10 an chakna a ni a. World Cup khelh hma in North London club an che tha tluang hle.
Gunners tan lawmna
Arsenal in an result avangin lawmna tur an nei a, goal an khung hleithei lo chu an duhthu sam lo lai tur nimahsela an tan inkhelah lawmna tur a tam.
First half inkhel an thunun hneh a, Eddie Nketiah in chance tha hloh nual lo se a aia tam zawk goal khung thei tur an ni.
Zurich goalkeeper Yanick Brecher a che tha hle a. Fabio Vieira leh Nketiah te goal khung ngei tur a lang a dang ve ve.
Minute 17-naah Tierney-a’n goal a khung chu an belh thei lo. Zurich in Adrian Guerrero hmanga goal an khung chu offside avanga pawm a ni lova, Ukrainian forward Bogdan Viunnyk chuan huntha tak a bawhpelh ve bawk.
Arsenal in an mikhualte an chelh tluan thei a, an tana chanchin lawmawm dang leh awm chu Bukayo Saka niin second half-ah inkhel tura dahluh a ni a. A inhliam chu a tira an hlauhthawn angin a na lova, a inkhel leh thei tawh.
Arteta a lawm
Gunners manager Arteta chuan hnehna chan tluan chuan an inrintawkna a tihlen thu a sawi a. “Kan tum kan hlen. Inkhel hmuhnawm leh kan hlauhawmna ber inkhel a ni lo chiang, mahse a pawimawh ber hnehna kan chang.
“He inkhel hi kan tan a pawimawh hle. February thla a kan hmabak thlirin kan tan chak a pawimawh hle a. Tuna hnehna kan chan hian kan chak chhoh zelna tur hi thui takin a pui dawn.” a ti a. “Tlawm aiin chak hnuah dressing room boruak pawhin hma a sawn thin.” tiin a sawi belh.
Playoff khel tur United
Manchester United in hnehna an chang a, Real Sociedad la tlawm lo chu an mualah va hneh mahse Group E-ah pahnihna bak an ni thei lo.
Erik ten Hag-a pawlte hian Spain atang hmahruaitu ni chunga kir turin goal hnih tal a chak an mamawh. Rawlthar Alejandro Garnacho chuan inkhel a goal awmchhun khungin United tana lawmna thlentu a ni a, a tawp thleng Red Devils in nawr mahse an tum ram tak an thleng thei lo.
Anoeta Stadium-ah kum 18 mi Madrid apiang , a nu Argentine a nih avanga Argentina squad a an ko tawh Garnacho hian Red Devils tana inkhel bul a tan vawi hnihnaah minute 17-ah goal a khung a. A ngaihsan Cristiano Ronaldo ball siamsak chu khungin a tlanchakzia a tilang.
Ronaldo hian halftime hma in goal khungna huntha tak mai a hloh a. Second half-ah pawh chance tha a neih a khung lo. Lehlamah an goalkeeper David de Gea chuan Andoni Gorosabel leh Pablo Marin te goal khung tur a dang thung.
United leh Sociedad hian point 12 ve ve hmu mahse goal difference-ah Spanish club an sang zawk a. United hian February thla ah UEFA Champions League atanga tla club-te nen knockout-round play-offs an khelh a ngai dawn tihna a ni.
An club hmachhawn theih zingah Barcelona, Juventus, an coach Ten Hag-a team hlui Ajax leh Shakhtar Donetsk te an tel.
Coach Ten Hag chuan, “Vawiinah hnehna kan chang a, mahse kan mamawh chu goal hnih a nih avangin kan lawm a kim chiah lo. Game khelh tur pahnih kan neih belh tihna a ni a, season hautak nimahsela kan squad a chhah tha tawk.” a ti.