Pakistan-a prime minister thutthleng atanga paih thlak tawh, Imran Khan chu India-ah a hming hriat hlawh a ni a, Ningani tlaia beih a tawh hnuah phei chuan sawi tam a ni hle.
Delhi leh Islamabad inkar chhe kumkhua mah se Khan-a erawh hi chuan Indian-te zingah a tla na hle tih theih a ni.
Ningania thuthar lakhawmtute a kawmnaah India external affairs ministry thupuangtu, Arindam Bagchi chuan Pakistan boruak chu ‘uluk taka an thlithlai reng’ thu a sawi.
Indian Express chanchinbuah political commentator Sanjay Baru chuan Khan-a thah tuma beihna chu thil kal mek kawng dawng zawhtirtu a nih thu leh Pakistan-a politics hruaituten chona hautak tak an hmachhawnzia lanna a nih thu a ziak.
Indian Twitter-ah Khan-a kah a nih hnu atang khan Pakistan tih chu mite sawi leh zawn nasat a ni nghal.
Chhungkaw hausa tak atanga piang, cricketer hlui, an ram pawh 1992 World Cup-a champion-puitu, Khan-a hi kum 1990 chhova a inkhel en hman Indian sang tam takte rilrua la tla na a ni.
Amah pawhin vawi tam India tlawhin Indian mi langsar tak tak, Bollywood lama hmingtha chenin a kawm kual thin.
Video hlui pakhatah chuan Khan-a hi Amitabh Bachchan-a nen Pakistani zaithiam, Nusrat Fateh Ali Khan-a’n qawwali a sa lai an ngaithla dun a. He video hi vawi tam tak India-ah chuan inthawn kual a ni nghal.
Kum 2018-a prime minister nih a tum thu a puan khan ei rukna tihbova Indian-te nena inkawmngeihna siam a tum thu a sawi tawh.
India nena inkungkaihna muanawm leh rintlak siam a tum thu a sawi hian an thenawm ram nena an inhnaih zual sawt beiseina pawh a tisang hle.
Mahse, a larna leh a tumna chuan chu chu a tithei bik lo va, a hun lai hian India leh Pakistan inkar a chhe sauh zawk.
Indian venhimna hnathawktute convoy chu February, 2019 khan beih niin sipai 40 zet an thi a, Delhi chuan Pakistan-a hmunpui nei, Jaish-e-Mohammad tihah a puh a. Khan-a pawhin TV-ah chhangin India chu ‘a finfiahna nei lovin Pakistan puh ngawt tawh lo turin’ a ti.
Kum 2019-ah vek hian India chuan an ram inchuh, Pakistan pawhin a ram nia a chhal, Kashmir-a awp dan hmang a thlak a, mahnia ro inrel theihna (state) a nihna hlipin sorkar laipui hnuaia awm turin territory pahnihah a then a, hei hian Pakistan a tithinur zual hle.
Khan-a sorkar chuan India tih dan chu ‘Kashmir leh a mipui neksawrna’ tia sawiin India nena an insumdawn tawnna a titawp a, nuclear nei ram pahnihte inkar a chhe zual.
Pakistan-in China a kawmngeih tlat pawh India huat tawk a tling a. Indian leh Chinese sipaite hi kum 2020 khan Himalaya tlangdunga an inrinaah intibuaiin an inkar a chhe zual.
India palai ni thin, Anil Trigunyat chuan Khan-a hi ‘mi ngainat chi tak’ a nih rualin tun hnaia thil thleng hrang hrang avangin India-a ngainat a hlawh leh leh a larna chu a tlahniam niin a sawi.
“Ram hruaitu i niha i ramin mi ram a beihnaah hruaitu i nih chuan, i do rama mite chuan an ngaina lo thuai ang che, cricket hmanga an ngainat hi an hnawl tan,” a ti.
Trigunyat-a hian Khan-a beihna chu a dem thu leh ram hnih inkar chu muanawm taka a awm chu India leh Pakistan duh dan ve ve a nih thu a sawi.
Khan-a hian India-ah hian a tha zawng leh a chhe zawngin ngaihven a hlawh ve ve a ni.