Aizawl : Central YMA leh MSACS bultuma HIV/AIDS do kawnga hmalakna, ‘Zoram harh rawh campaign’ hnuaia Branch YMA te Mizo hnam lam leh hnam zai hmanga intihsiakna neih tur buaipuitu, Champhai Dist level organising committee an Chairman, Champhai Bawrhsap James Lalrinchhana hova thukhawmin, HIV/AIDS laka inven chungchang inzirtirna zau zawka kalpui dan tur leh tul leh pawimawh dangte an sawiho.
Bawrhsap chuan Zoram harh rawh campaign-in a tum tlangpuite sawiin, mipui huapzo HIV/AIDS chungchang inzirtirna kalpui tura hmalakna, ram leh hnam himna leh damkhawchhuahna tura pawimawh tak a nih thu a sawi a. Hlawhtling taka kalpui a nih theih nan hmalaknate puanzar leh inhriatpuitawna, inrawntlan zel a pawima- wh thu a sawi.
He inelna hi Nov ni 17 leh ni 18-ah Kahrawt field leh Community hall, Champhai-ah te neih turin committee chuan a ruahman a. Ni 17-ah a hawnna, awareness campaign leh hnam lama intihsiakna ne- ih a ni ang a, a ni hnihna Nov ni 18-ah hnam hlaa intihsiakna leh kharna hun hman a ni ang. Hun hman dan tur kimchang duanga tuldang buaipui turin Sub-Hqrs YMA chu committee-in a ruat bawk.
Mizo hnam lam inelna turin Cheraw (Kantluang) leh Khuallam thlan a ni a, hlaa inelna turin Darmani Zai chu hla intawm atana thlan a ni. Lianrikhumi Zai, Awithangpa Tlawh Zai, Labour V Force Zai leh Domangi Zai te zinga duh ber thlan theih a ni dawn bawk a ni.
Champhai dist-ah hian he inelnaa turin – Zotlang, Venglai, Kahrawt, Vengthlang leh Vengthar ten hming an pe tawh a ni.