Kolasib District Land Owners Association-in sorkara an thil ngiatte tihhlawhtlinsak an nih hma chuan Vairengteah kawngpui dan chhunzawm zel an tuma. Sorkar aiawhte nen inbe mah se, an inrem thei lo.
Vairengte leh Sairang inkar kawngpui siamna atana an ram laksak neitu intelkhawm, Kolasib District Land Owners Association (Vairengte- Kawnpui, package 3-6 NH 06 & 306)-in zangnadawmna phuta lungawi lohna lantirin kawngpui an dan chu nimin khan an chhunzawm.
Kawngpui dan a nih avang hian Mizoram pawn atanga lirthei lo lut an awm lo a, Mizoram atanga lirthei chhuak erawh dan an nih ve loh avangin state pawna chhuak eng emaw zat a awm thung.
Zirtawpni tlai dar 3 khan Vairengte SDO (C) Conference Hall-ah Addl DC Lallawmawma, Chairman, CALA ni bawk kaihhruaina hnuaiah ram neitute nen kawngpui dan chungchangah inbiain an thukhawm a. He thutkhawmah hian Settlement Officer, Kolasib leh SDO (C) Vairengte ten an tawiawm.
Thutkhawmah hian Addl. DC chuan ram neitute chu an lungawi lohna chungchangah thuneituten hma an lak mek thu a sawi a. Chawlhkar thar, |hawhtanni hian Highway Empowerment Committee an thukhawm dawn a, ram neitute harsatna thawh mek pawh sawiho a nih a beisei thu a sawi a. Ram neitute harsatna tawh mek chu chin fel tura buaipui mek a nih avangin, an kawngpui dan mek chu tawpsan turin a ngen a, a tul a nih chuan 144 CrPC pawh puan a nih tur thu a sawi tel bawk.
Hetih lai hian, ram neitute chuan sorkara an beisei ang chhanna an la hmuh loh thu sawiin, an beiseina tihhlawhtlinsak an nih hma loh chuan kawng an dan chu chhunzawm zel an tum thu an sawi ve bawk a. 144 CrPc an puang a nih chuan theihtawp chhuaha nawr chhunzawm zel an tum thu an sawi bawk.
The Zozam Times zawhna chhangin Land Owners Chairman Lalmalsawma Ngente chuan, an thil phutte hi sorkarin a duh chuan awlsam taka chin fel theih a nih thu a sawi a. “Forest department hian 1956 dan tlawh chhanin kan ramte chu an ta tiin min hauh luihsak a. Four-lane atana package 3-6 inkara ram lak tur 229.663 Ha. chu an ram angin forest department chuan an hauh a, hemi chhungah hian revenue pass nei mi 122 an awm mek a, heng pass neite hi CA leh NPV atan hian min laksak lo se, hemi chungchang hi forest department leh revenue department lamten an chin fel theih chuan kawng dan kan kalpui mek hi kan titawp thei reng a ni,” a ti.
Tun dinhmunah Vairengte daia Mizoram mamawh lak luhna kawngpui ber danchah chhunzawm zel turin an duty-na hmunah an inkhuar mek a. Zan riaka duty tur pawh nizan lam khan mi 50 bawr vel an inruat niin Lalmalsawma Ngente hian The Zozam Times a hrilh bawk.