Khan-a hi April thlaa paih thlak a nih hnuah khan thuneihna a chan leh thuai theih nan inthlan thuai phutin ‘kawng zawh’ (long march) a huaihawt.
Ningania a hote nen Wazirabad an thleng a, a thu sawi ngaithla turin mi tam tak an pungkhawm nghal.
Truck hnung hawn chunga thu sawia a ding lai chu kah a ni ta a, a bul hnaiah a thawhpui leh an party mi tam tak an awm bawk.
“A ni thut a, engnge thleng tih ngaihtuah nan hun ka hmang zawk,” tiin an party mi pakhat, Mueezuddin chuan BBC hnenah a sawi.
Vanneihthlak takin pawikhawihna lian lutuk a thlen hmain a titu ber chu an man hman ta hlauh a ni.
“A beitu kan va hmu a, a silaimu a lo kap ruak a, a dang thun a tum leh leh mek laiin a hnung atangin mipa pakhatin a lo man bet a ni,” tiin Mueezuddin chuan a sawi.
Social media-a video thehdarhah chuan a kaptu hian a pistol-in Khan-a awmna lam hi a tin a; mahse, man beh hman a ni.
Video darh leh thil thleng hmutu thenkhat chuan venhim hna thawktute pawhin bawm lian (container) atanga silai kah hi an hmu niin an sawi.
Mueezuddin-a chuan silai a puah hnuah khan Khan-a leh a bul vela mite chu an awp hniam nghal a, silaiin a fuh pawh khan a chiai lo va, amah vengtuin first aid a pe nghal niin a sawi.
Silai kah tlang theih loh car-ah luhpuiin Lahore-a damdawi in an panpui nghal a ni.
Punjab Chief Minister Pervez Elahi chuan beitu hi pakhat aia tam an ni thei tih a sawi a, Khan-a kea kaptu khan a hma lam atangin a kap a, a beitu man hi ding lama mi a ni si niin a sawi.
Pakistan prime minister hlui beihna hi amah tantute chuan that tumna nia sawiin ram tam takin an dem thu an sawi bawk.
Beihnaah hian mi pakhat thiin mi dang 10-in hliam an tuar.
Khan-a hi a ngaihtuahawm loh tih a team chuan an sawi a, damdawi in pawh a chhuahsan thuai ang.
Ningani tlaia an hotupa ber beih a nih hnuah hian Pakistan Tehreek-e-Insaf (PTI) chuan Zirtawpni tawngtai hun zawhah ram pumah duh lohna an huaihawt nghal. Party dintu, tuna an ram president ni mek, Arif Alvi chuan ‘rawng taka mi thah tumna’ tiin a sawi a. An ram khawpui, Islamabad-ah chuan sikul chawlh puan a ni.
Khan-an politics-a a epte pawhin beih a tawk chu an dem a, Prime Minister Shehbaz Sharif chuan chiang taka chhui a nih tur thu a puang nghal a ni.