Ningani tlaia Power & Electricity Department, Lawngtlaia lineman Francis Rochungnunga’n electric hrui a siam laia current-in a man avanga thihna thleng chungchanga mawhphurtu chu hrem a ni dawn tih P&E Minister R Lalzirliana’n a sawi a, Lawngtlai P&E SDO suspend a ni bawk.
November 3, 2022 tlai dar 4 vel khan P&E Department, Lawngtlaia thawk, Francis Rochungnunga, College Veng, Lawngtlai chu AOC Venga electric hruai a siam laiin electric current-in manin district hospital panpui ni mah se chhan theih a ni lo.
He thihna thleng chungchanga a mawhphurtu chu hrem an nih ngei tur thu P&E Minister R Lalzirliana chuan The Zozam Times zawhna chhangin a sawi a. A mawhphurtua ngaih, Lawngtlai SDO Lalnghakliani chu a hna atanga chawlh lailawktir nghal a ni a, nimin chawhnu khan P&E Secretary H Lalengmawia’n SDO suspend order hi a tichhuak a ni.
Vanduaina a thlen zan hian Young Lai Association (YLA) member eng emaw zat chu P&E Lawngtlai Division office tualah pungkhawmin a mawhphurtu hrem an phut thu te, zangnadawmna pek an phut thu te an aupui a, buaina liantham chhuak erawh a awm lo.
Nimin khan Lunglei Power Cirdle-a S.E H. Zonunsanga leh E.E pahnihin vanduaina thlen dan chhui chiang turin Lawngtlai an thutchilh nghal a, Central YLA hruaitute an kawm nghal bawk.
SE H Zonunsanga chuan he thihna thleng chungchanga mawhphurtua ngaih SDO chu suspend a nih thu sawiin, helai bialtu JE leh control room-a duty-te pawh chhuichian nghal an nih thu a sawi a. Vanduaina tawka boral ta, Francis-a chhungte zinga mi hnathawk thei awm an awm chuan a remchan dan anga an hnathawh tur an ngaihtuahsak nghal tur thu leh zangnadawmna pawh buaipui nghal a nih tur thu a sawi.
Lawngtlai atanga thudawn danin P&E lineman eletric-in a man avanga thihna thleng chungchangah hian Lawngtlai Police Station-ah thubuai ziah luh a ni tawh a, vanduaina thlen laia control room-a duty chu Lawngtlai Police ten thubuai an siamsak a. Francis Rochungnunga ruang hi nimin zing khan postmortem a nih hnuah an khua Cheural panpui a ni, a nupui leh a fanute pahnih a kalsan a ni.