Ukraine President Volodymyr Zelensky chuan Kremlin chu ‘energy terrorism’ kalpuiah a puh a, hetih lai hian Russian sipaite chuan indona mualah hma an sawn leh hret bawk.
Zelensky-a chuan Russian-ten an energy network an beih avangin mi maktaduai 4.5 zet power nei lova an awm mek thu a sawi.
Tun hnai hun eng emaw chen atang khan Russia hian Ukrainian power siam chhuahna hmun hrang hrangte chu missile leh drone hmangin a bei nasa hle a ni.
Russian sipaiten chhim lam khawpui pawimawh, Kherson atanga an inhnuhdawh thu puan a nih mek laiin Moscow hian energy hmunpuite hi a bei a ni.
Indona muala nasa taka hneha an awm hnuah Russia hian tun hnaiah indona mual atanga hmun hla zawk, khawpuiten electric an lakna hmunte chu a bei ta vak a ni.
Thla hmasa chhung ringawt pawh khan an rama power station hmun thuma hmun khat zet tihchhiatsak an nih thu President Zelensky chuan a sawi.
Ukrainian sorkar hian an mite chu energy ren taka hmang turin an tih phah a ni.
“Mi maktaduai 4.5 chuang zet an energy hmang thei lovin an awm a ni,” tiin Ningani zana thu a sawinaah President Zelensky chuan a sawi.
Russia-in energy hmunpui an bei chu ‘an chak lohzia’ tih lanna a nih thu leh an inbeihna mualah an sipaite an hlawhchham mek zel thu a sawi.
“Russia hian energy terrorism an kalpui hian kan hmelmate chak lohzia a pho lang a ni,” a ti.
“Indona mualah Ukraine an hneh lo va, heti zawng hian mipuite mamawh lamah an tuan ta a ni,” a ti.
Russian defence ministry pawhin Ukrainian energy infrastructure an beih thu hi an puang.