Zelensky-a’n hetianga a puh mek lai hian Russian sipaiten an thunun lai, Kherson chu an chhuahsan nia sawi a awm mek bawk a, Russia an inhnukdawk tihna a ni.
Russia-in thuneitu tura Kherson region-a a dah, Kirill Stremousov chuan Russian chanchinbu hnenah Moscow hian a sipaite chu a lak chhuah ‘hmel hle’ tiin a sawi.
Khawthlang ram thuneitu sangte pawhin Russian commanding officer lawng zualte chu khawpui atangin an insuan chhuak tawh hlawm niin an sawi mek bawk.
Khawpui luah leh vawnhim reng tum ai chuan Russian sipaite hian Dnipro River kama tan lo khawh tura inhawr khawm zawk an tum niin an sawi a, lui kamah hian an insawh ngheh theih chuan thlasik lo thlen hmain Ukraine chhim lam leh khawchhak lam chu an luah nghet thei dawn tihna a ni.
Kherson khawpui chhunga thil thleng tak tak hi hriat a har a; mahse, thuneitu sang pakhat chuan Russian la awm mekte hian inthiar chhuak hnuhnungte vengin an la awm rih chauh niin a sawi.
Kherson-ah hian bank awmte chu a ruak vek a, museum pawh nasa taka rawk a ni tih BBC chuan a tar lang.
Russia-in thuneitu atana a dahte chuan civil mite pawh tun hnaiah a sang telin khawpui an chhuahsan tih an sawi.
US Defence Secretary Lloyd Austin chuan Ukrainian sipaite chuan chhim lam khawpui hi an la thei tih a sawi.
Ukraine erawh chuan an fimkhur takin an la bei zel tih an sawi.