Ni hnih chama Mizorama tlawhtu, President Droupadi Murmu chuan nimin khan Mizoram Legislative Assembly Special Session-ah thu a sawi a, Mizoram tana harsatna lian ber, inkalpawhna chungchang chu sorkar laipuiin a ngaih pawimawh thu a sawi.
President chuan Mizoramah inkalpawhna a that chuan zirna leh hriselna kawnga hmasawnna bakah mipui eizawnna a tih awlsam phah dawn tih sawiin, “Inkalpawhna chungchanga harsatna sutkian chu ngaih pawimawh a ni a, mipuite nun tiawlsam turin hmalakna hrang hrang kalpui mek a ni,” a ti.
Mizoram chu a ram leilungin eng emaw chenah harsatna thlen mah se tehna hrang hrangah hma a sawn zel niin president chuan a sawi a. Digital India hnuaiah Mizoram chuan central leh state sorkar hmalaknate chu a chhawr zel tur thu a sawi.
Mizoram bakah hmarchhak state dangte hmasawnna chu ramin bung thar a kai zelna atan a pawimawh thu sawiin, president chuan Asia chhimchhak leh Asia Pacific ramte nena inpawhna tha nei turin hmarchhak state-te chu Act East Policy hnuaiah ngaih pawimawh an nih thu a sawi a. Mizoram chu India-in a thenawm ramte nena inpawhna tha zawk neih a tumna kawnga tha thawhtu leh chhawrtu a nih a beisei thu a sawi.
President chuan Mizoram Legislative Assembly-in kumin May-a Golden Jubilee an thleng thei chu a lawmpui thu sawiin, “Mipuite duh dan auchhuahpuia mipuite aiawhtu tha tak leh dan an siamna kawnga mi tam zawk hmakhawngai thintu member ni tawh leh ni mekte an fakawm hle a ni” a ti.
Assembly special session bultannaa president lawmna thusawitu, Larsap Dr Hari Babu Kambhampati chuan thlan tlin a nih hnu reilo te chhunga president-in Mizoram a tlawh chu lawmawm a tih thu a sawi a. President-in Mizoram a tlawh chuan MLA-te chona thar pea an hna tha lehzuala thawk tura a puih ngei a rin thu a sawi.
House Leader Zoramthanga’n tribal hmeichhia president atana thlangtu sorkar laipui fakin, kum 1986-a remna thuthlung ziahin Mizoram chu India rama state ralmuang berah a siam niin a sawi a. Mizoram chu hausa lo mah se, remna leh muanna a neih chu thawnchhuah tlak khawpa ram dangte awh ber a nih thu a sawi bawk.