Donald Trump chuan White House luah tura kir leh a tum thu a sawi thawi a, tun tuma a sawi hi a sawi tawh china la chiang deuh ber a ni.
US president hlui hian Iowa-a mipui hmaah kum 2024 inthlan chuh leh a tum chungchang hi ‘ka tum leh mai theihna hi a sang hle’ tiin a sawi.
Trump-a hi an ram midterm election an neih turah Republican candidate-te tan ni nga chhunga vawi li inkhawm a huaihawt tura a hmasa berah a inlan.
President Joe Biden-a pawhin inthlana an party an chak ngei theih nan ram chhung tlawh kualin a zin mek bawk.
Biden-a emaw, Trump-a emaw hi Thawhlehnia an inthlan turah hian American mipuiten an vote tur an la ni lo va; mahse, he inthlan hi US Congress-a rorel khawl member tur leh state pawimawha governor tur thlanna a ni.
Midterm election hi a hnu kum hniha president thlan tur boruak hriltu lian tak a ni thin.
Ningani zana hun a hmannaah hian Republican Trump-a chuan kum 2020 inthlana a chak lohnaah inthlan tihchingpenna lian tak a awm tih a la sawi leh.
“Vawi hnih ka chuh a, vawi hnih ka chak a. A vawi khatna aiin a vawi hnihnaah ka che tha zawk a, kum 2016 aiin 2020-ah khan vote maktaduai chuangin ka hmu tam zawk,” a ti.
“Chutiang bawkin president tang laiten vote an hmuh tam ber chu ka khum var var bawk a. Tunah erawh chuan kan ram hi hlawhtling, him leh ropuia siam turin hma kan la a. Ka chuh leh theihna hi a sang hle a ni,” a ti.
Amah lawmtu mipui tam tak hmaah hian Trump-a chuan, “Nakin lawkah kan inpeih ang,” a ti bawk.
Trump-a hian a insawi ang takin kum 2020 khan vote maktaduai 72 zet hmuin president tang lai zinga hmu sang ber record thar a ni a; mahse, Biden, Democrat candidate khan vote maktaduai 81 a hmu thung.