West Ham United in Europa Conference League group stage chu hnehna chang vekin an khar a. Ningani zanah 3-0 in Romania-ah an chak.
Premier League club hian Bucharest a National Arena-ah FCSB an hmachhawn a. Spanish midfielder Pablo Fornals chuan goal hnih khungin second half-ah own goal an neih belh.
Group B-ah tling chiang tawh an nih bakah an san ber tawh avangin Hammers manager David Moyes chuan player naupang zawkte tan inkhelhna hun a siamsak a. Hammers rawltharten an huntha neih an chhawr tangkai.
Kum 18 mi forward Divin Mubama chuan goal a khung teuh a. Ani bakah kum 16 leh ni 326 a upa Oliver Scarles ten bul an tan a. Conor Coventry, 22, Flynn Downes, 23, leh kum m22 mi full-back Ben Johnson te pawn bul tanin an tih tur tha takin an ti vek thei.
Moyes chuan, “First team player-te tan inthlahdah a thiang lo tih kan lantir in ka hria. Player naupang zawkte an kheltha hle. Under-23s ah an che tha a, an phur in an thawkrim thin hle.” tiin a rawltharte a fak.
Inkhel dangah Group A lamah Fiorentina in goal thum khung mahse pakhatna an chang zo lo.
Latvian club Rigas Futbola Skola lakah Antonín Barák, Arthur Cabral leh Riccardo Saponara ten goal khungin 3-0 in an chak.