Ducati bike khalhtu Francesco Bagnaia chuan season tawpna intlansiakah a mamawh result a nei a. World championship-ah amah eltu ber Fabio Quartararo chuan lehpel thei lovin Italian rider hi a vawikhatna atan a champion.
Pathianni zana Circuit Ricardo Tormo a intlansiakah champion lai Quartararo hian point 23 a hniam zawkin bul a tan a. Yamaha bike khalhtu hian world champion ni turin hnehna a chan ngei ngei a ngai a, Bagnaia in point hnih aia tam lo a hmuh a ngai.
Intlansiak tanin pariatna atanga tlan tan Bagnaia te an intai avangin a tlahniam hman viau a, mahse pakuanaah a tlan zo. A elpui Quartararo hi palinaah tlan zo mahse champion nan a tawk lo.
Italian team Ducati in kum 2007 a Casey Stoner a champion hnua a vawikhatna atan World championship title an la a. Tun season-ah ‘Triple Crown’ champion niin rider’s world title an lak bakah Team leh Constructor’s Championships an la bawk.
Bagnaia chuan intlansiak zawhah, “Intlansiak ka hmachhawn tawha la hautak ber a ni. Top five-ah lan ngei kha ka tum a, mahse kan bul tan dan avangin a harsa hle. A tir lap li chhung vel kha chu ka tlan chak tak tak thei, ka bike ke hmalam kha thunun a harsa hle.”
“A pawimawh ber erawh kan tum kan hlen a, world champion kan ni hi a ni. Kan tan ni duhawm tak a ni.” tiin a sawi.
He intlansiaka hnehna chang Alex Rins chuan, “Hnehna nena season khar hi kan tan thil lawmawm a ni a, hei baka tha hi a awm lo.” tiin a sawi ve bawk.